ವಿಶ್ವದಾದ್ಯಂತ ವನ್ಯಜೀವಿಗಳ ರಕ್ಷಣೆಗಾಗಿ ಎಷ್ಟೇ ಕಠಿಣ ಕಾನೂನುಗಳು ಬಂದರೂ ಸಹ ಪ್ರಾಣಿಗಳ ಅಕ್ರಮ ಬೇಟೆ ಮತ್ತು ಸಾಗಣೆ ನಿಲ್ಲುತ್ತಿಲ್ಲ. ಔಷಧಗಳ ತಯಾರಿಕೆ, ಅಲಂಕಾರಿಕ ವಸ್ತುಗಳು, ಮಾಂಸ ಮತ್ತು ಸಾಕುಪ್ರಾಣಿಗಳ ವ್ಯಾಪಾರಕ್ಕಾಗಿ ಕೆಲವು ವಿಶಿಷ್ಟ ಜೀವಿಗಳನ್ನು ಜಗತ್ತಿನಾದ್ಯಂತ ಭಾರಿ ಪ್ರಮಾಣದಲ್ಲಿ ಸಾಗಿಸಲಾಗುತ್ತಿದೆ. ಇದರಿಂದಾಗಿ ಹಲವು ಪ್ರಾಣಿ ಪ್ರಭೇದಗಳು ಇಂದು ಸಂಪೂರ್ಣ ಅಳಿವಿನ ಅಂಚಿಗೆ ಬಂದು ತಲುಪಿವೆ. ಅದರಂತೆ, ಜಗತ್ತಿನಲ್ಲಿ ಅತಿ ಹೆಚ್ಚು ಕಳ್ಳಸಾಗಣೆಯಾಗುವ ಪ್ರಾಣಿಗಳು ಯಾವುವು ಎಂದು ಇಲ್ಲಿದೆ ಮಾಹಿತಿ:
ಜಗತ್ತಿನಲ್ಲೇ ಅತಿ ಹೆಚ್ಚು ಅಕ್ರಮ ಸಾಗಣೆಗೆ ಒಳಗಾಗುವ ಸಸ್ತನಿ ಎಂದರೆ ಪ್ಯಾಂಗೋಲಿನ್ (ಕವಚಿ ಕರಡಿ). ಇದರ ದೇಹದ ಮೇಲಿರುವ ಬಿರುಸಾದ ಪೊರಕೆಗಳು ಸಾಂಪ್ರದಾಯಿಕ ಚೀನೀ ಔಷಧಗಳಲ್ಲಿ ರಕ್ತಪರಿಚಲನೆ ಮತ್ತು ಸ್ತನಪಾನ ಸುಧಾರಿಸಲು ಬಳಕೆಯಾಗುತ್ತವೆ ಎಂಬ ಮೂಢನಂಬಿಕೆಯೇ ಇದಕ್ಕೆ ಕಾರಣ. ಚೀನಾ ಮತ್ತು ವಿಯೆಟ್ನಾಂ ಮಾರುಕಟ್ಟೆಗಳಲ್ಲಿ ಇದರ ಮಾಂಸಕ್ಕೆ ಭಾರಿ ಬೇಡಿಕೆಯಿದ್ದು, ಪ್ರತಿವರ್ಷ ಲಕ್ಷಾಂತರ ಪ್ಯಾಂಗೋಲಿನ್ಗಳನ್ನು ಕಾಡಿನಿಂದ ಅಪಹರಿಸಿ ಕೊಲ್ಲಲಾಗುತ್ತಿದೆ.
ಚಿನ್ನಕ್ಕಿಂತ ದುಬಾರಿ ಕೊಂಬುಆಫ್ರಿಕಾ ಮತ್ತು ಏಷ್ಯಾದ ಕಾಡುಗಳಲ್ಲಿ ಖಡ್ಗಮೃಗಗಳ ಬೇಟೆ ನಿರಂತರವಾಗಿ ನಡೆಯುತ್ತಿದೆ. ಇದಕ್ಕೆ ಪ್ರಮುಖ ಕಾರಣ ಅದರ ಮೂಗಿನ ಮೇಲಿರುವ ಕೊಂಬು (Rhino Horn). ಕಪ್ಪು ಮಾರುಕಟ್ಟೆಯಲ್ಲಿ ಇದರ ಬೆಲೆ ಚಿನ್ನ ಹಾಗೂ ಕೊಕೇನ್ಗಿಂತಲೂ ಹೆಚ್ಚಾಗಿದೆ. ಕ್ಯಾನ್ಸರ್, ಜ್ವರದಂತಹ ಕಾಯಿಲೆಗಳಿಗೆ ಇದು ರಾಮಬಾಣ ಮತ್ತು ಇದು ಶಕ್ತಿವರ್ಧಕ ಎಂದು ವಿಯೆಟ್ನಾಂನ ಶ್ರೀಮಂತರು ನಂಬಿರುವುದೇ ಇವುಗಳ ಜೀವಕ್ಕೆ ಕಂಟಕವಾಗಿದೆ.
ದಕ್ಷಿಣ ಏಷ್ಯಾ ಮತ್ತು ಆಫ್ರಿಕಾದ ಕಾಡು ಆನೆಗಳು ದಂತದ ಆಸೆಗೆ ಬಲಿಯಾಗುತ್ತಿವೆ. ಆನೆ ದಂತದಿಂದ ತಯಾರಿಸುವ ಆಭರಣಗಳು, ಕಲಾಕೃತಿಗಳು ಮತ್ತು ಧಾರ್ಮಿಕ ವಿಗ್ರಹಗಳು ಶ್ರೀಮಂತಿಕೆಯ ಸಂಕೇತ ಎಂದು ಪರಿಗಣಿಸಲ್ಪಟ್ಟಿವೆ. ಅಂತರರಾಷ್ಟ್ರೀಯ ಮಟ್ಟದಲ್ಲಿ ಆನೆ ದಂತದ ವ್ಯಾಪಾರವನ್ನು ಸಂಪೂರ್ಣವಾಗಿ ನಿಷೇಧಿಸಿದ್ದರೂ, ಕಳ್ಳಸಾಗಣೆದಾರರು ಗುಪ್ತ ಮಾರ್ಗಗಳ ಮೂಲಕ ಚೀನಾ, ಜಪಾನ್ ಮತ್ತು ಅಮೆರಿಕದ ಮಾರುಕಟ್ಟೆಗಳಿಗೆ ಇದನ್ನು ರವಾನಿಸುತ್ತಿದ್ದಾರೆ.
ಚರ್ಮ, ಉಗುರುಗಳ ವ್ಯಾಪಾರಏಷ್ಯಾದ ಹೆಮ್ಮೆಯಾದ ಹುಲಿಗಳು ಇಂದು ಕಳ್ಳಬೇಟೆಗಾರರ ಜಾಲದಲ್ಲಿ ಸಿಲುಕಿವೆ. ಹುಲಿಯ ಚರ್ಮವನ್ನು ಐಷಾರಾಮಿ ಮನೆಗಳ ಅಲಂಕಾರಕ್ಕೆ ಬಳಸಿದರೆ, ಅದರ ಉಗುರು, ಹಲ್ಲು ಮತ್ತು ಮೂಳೆಗಳನ್ನು ಸಾಂಪ್ರದಾಯಿಕ ಏಷ್ಯನ್ ಔಷಧಗಳ ತಯಾರಿಕೆಯಲ್ಲಿ ಬಳಸಲಾಗುತ್ತದೆ. ಚೀನಾದಲ್ಲಿ 'ಟೈಗರ್ ವೈನ್' (ಹುಲಿ ಮೂಳೆಗಳನ್ನು ನೆನೆಸಿದ ಮದ್ಯ) ಎಂಬ ವಿಲಕ್ಷಣ ಪಾನೀಯಕ್ಕೆ ಭಾರಿ ಬೇಡಿಕೆಯಿದೆ.
ಅಕ್ವೇರಿಯಂ ಮತ್ತು ಸೂಪ್ಗೆ ಬಲಿಭಾರತದ ನಕ್ಷತ್ರ ಆಮೆಗಳು ಮತ್ತು ಸಮುದ್ರದ ಕಡಲಾಮೆಗಳು ಅತಿ ಹೆಚ್ಚು ಕಳ್ಳಸಾಗಣೆಯಾಗುತ್ತವೆ. ಅಪರೂಪದ ಆಮೆಗಳನ್ನು ವಿದೇಶಗಳಲ್ಲಿ ತಾವಿರುವ ಮನೆಗಳಿಗೆ ಅದೃಷ್ಟ ತರುತ್ತದೆ ಎಂಬ ನಂಬಿಕೆಯಿಂದ ಸಾಕುಪ್ರಾಣಿಯಾಗಿ ಇಟ್ಟುಕೊಳ್ಳಲು ಸಾಗಿಸಲಾಗುತ್ತದೆ. ಮತ್ತೊಂದೆಡೆ, ಚೀನಾ ಮತ್ತು ಆಗ್ನೇಯ ಏಷ್ಯಾದ ದೇಶಗಳಲ್ಲಿ ಇವುಗಳ ಮಾಂಸ ಮತ್ತು ಸೂಪ್ಗಾಗಿ ಟನ್ಗಟ್ಟಲೆ ಆಮೆಗಳನ್ನು ಚೀಲಗಳಲ್ಲಿ ತುಂಬಿ ಅಕ್ರಮವಾಗಿ ಸಾಗಿಸಲಾಗುತ್ತದೆ.
ಪಂಜರದ ಒಳಗೆ ಕರಗುವ ಜೀವಗಳುದಕ್ಷಿಣ ಅಮೆರಿಕದ ಅಮೆಜಾನ್ ಕಾಡುಗಳು ಮತ್ತು ಆಫ್ರಿಕಾದ ಕಾಡುಗಳಿಂದ ಸುಂದರವಾದ ಮೆಕಾವ್ ಗಿಳಿಗಳು, ಆಫ್ರಿಕನ್ ಬೂದು ಗಿಳಿಗಳು ಮತ್ತು ವರ್ಣರಂಜಿತ ಪಕ್ಷಿಗಳನ್ನು ಅಕ್ರಮವಾಗಿ ಹಿಡಿಯಲಾಗುತ್ತದೆ. ಇವುಗಳನ್ನು ಹಡಗು ಮತ್ತು ವಿಮಾನಗಳ ಸಣ್ಣ ಸಣ್ಣ ಪೆಟ್ಟಿಗೆಗಳಲ್ಲಿ ಕೂಡಿಟ್ಟು ಸಾಗಿಸುವಾಗ ಅರ್ಧಕ್ಕಿಂತ ಹೆಚ್ಚು ಪಕ್ಷಿಗಳು ಉಸಿರುಗಟ್ಟಿ ಹಾದಿಯಲ್ಲೇ ಸಾಯುತ್ತವೆ. ಬದುಕುಳಿದ ಪಕ್ಷಿಗಳು ಶ್ರೀಮಂತರ ಮನೆಗಳ ಪಂಜರ ಸೇರುತ್ತವೆ.
ಸೂಪ್ಗಾಗಿ ನಡೆಯುವ ಸಮುದ್ರ ಕ್ರೌರ್ಯಸಮುದ್ರದ ಪರಿಸರ ವ್ಯವಸ್ಥೆಯನ್ನು ಸಮತೋಲನದಲ್ಲಿಡುವ ಶಾರ್ಕ್ ಮೀನುಗಳನ್ನು ಕೇವಲ ಅವುಗಳ ರೆಕ್ಕೆಗಳಿಗಾಗಿ ಬೇಟೆಯಾಡಲಾಗುತ್ತದೆ. ಏಷ್ಯಾದ ಐಷಾರಾಮಿ ಹೋಟೆಲ್ಗಳಲ್ಲಿ 'ಶಾರ್ಕ್ ಫಿನ್ ಸೂಪ್' ಅತ್ಯಂತ ದುಬಾರಿ ಖಾದ್ಯವಾಗಿದೆ. ಬೇಟೆಗಾರರು ಸಮುದ್ರದ ಮಧ್ಯದಲ್ಲೇ ಶಾರ್ಕ್ ಮೀನುಗಳನ್ನು ಹಿಡಿದು, ಅವುಗಳ ರೆಕ್ಕೆಗಳನ್ನು ಮಾತ್ರ ಕತ್ತರಿಸಿಕೊಂಡು, ರಕ್ತಸ್ರಾವವಾಗುತ್ತಿರುವ ಜೀವಂತ ಮೀನನ್ನು ಮರಳಿ ಸಮುದ್ರಕ್ಕೆ ಎಸೆಯುವ ಘೋರ ಕ್ರೌರ್ಯ ಇಲ್ಲಿ ನಡೆಯುತ್ತದೆ.
ಫ್ಯಾಷನ್ ಉದ್ಯಮದ ಬಂಡವಾಳಹೆಬ್ಬಾವು, ನಾಗರಹಾವು ಮತ್ತು ಗೆಕ್ಕೋ ಎಂಬ ಅಪರೂಪದ ಹಲ್ಲಿಗಳ ಚರ್ಮವನ್ನು ಜಗತ್ತಿನ ಪ್ರಖ್ಯಾತ ಫ್ಯಾಷನ್ ಬ್ರ್ಯಾಂಡ್ಗಳ ಐಷಾರಾಮಿ ಹ್ಯಾಂಡ್ಬ್ಯಾಗ್, ಬೆಲ್ಟ್, ವ್ಯಾಲೆಟ್ ಮತ್ತು ಶೂಗಳನ್ನು ತಯಾರಿಸಲು ಬಳಸಲಾಗುತ್ತದೆ. ಇನ್ನು ಟೋಕೇ ಗೆಕ್ಕೋ ಹಲ್ಲಿಗಳು ಏಡ್ಸ್ ಮತ್ತು ಕ್ಯಾನ್ಸರ್ ಗುಣಪಡಿಸುತ್ತವೆ ಎಂಬ ಸುಳ್ಳು ವದಂತಿ ಇರುವುದರಿಂದ ಏಷ್ಯಾದಲ್ಲಿ ಇವುಗಳ ಅಕ್ರಮ ಸಾಗಣೆ ಹೆಚ್ಚಾಗಿದೆ.
ಪಂಜರದೊಳಗಿನ ನರಕಯಾತನೆವಿಶೇಷವಾಗಿ ಏಷ್ಯಾದ ಕಪ್ಪು ಕರಡಿಗಳನ್ನು ಅವುಗಳ ಪಿತ್ತಕೋಶದ ರಸಕ್ಕಾಗಿ ಬೇಟೆಯಾಡಲಾಗುತ್ತದೆ. ಚೀನಾದ ಸಾಂಪ್ರದಾಯಿಕ ವೈದ್ಯಕೀಯ ಪದ್ಧತಿಯಲ್ಲಿ ಈ ರಸಕ್ಕೆ ಭಾರಿ ಪ್ರಾಮುಖ್ಯತೆ ಇದೆ. ಕಳ್ಳಸಾಗಣೆದಾರರು ಕರಡಿಗಳನ್ನು ಜೀವಂತವಾಗಿ ಹಿಡಿದು, ಸಣ್ಣ ಪಂಜರಗಳಲ್ಲಿ ಕೂಡಿಟ್ಟು, ಅವುಗಳ ದೇಹಕ್ಕೆ ಕ್ಯಾತಿಟರ್ ಅಳವಡಿಸಿ ದಿನನಿತ್ಯ ಪಿತ್ತರಸವನ್ನು ಹೀರುವ ಮೂಲಕ ಜೀವಂತ ನರಕದ ದರ್ಶನ ಮಾಡಿಸುತ್ತಾರೆ.