ನವದೆಹಲಿ: ಭಾರತದ ಮಾಜಿ ನಾಯಕ ಮನ್ಸೂರ್ ಅಲಿ ಖಾನ್ ಪಟೌಡಿ ಅವರಿಗೆ ಗೌರವ ಸಲ್ಲಿಸುವ ಸಲುವಾಗಿ ವಾರ್ಷಿಕ ಉಪನ್ಯಾಸವನ್ನು ಆಯೋಜಿಸಲು ನಿರ್ಧರಿಸಿದ್ದು, ಫೆ.20 ರಂದು ಚೆನೈನಲ್ಲಿ ಆರಂಭವಾಗಲಿರುವ ಈ ಸಮಾರಂಭವನ್ನು ಭಾರತದ ಮಾಜಿ ನಾಯಕ ಸುನಿಲ್ ಗವಾಸ್ಕರ್ ಉದ್ಘಾಟಿಸಲಿದ್ದಾರೆ. ಮನ್ಸೂರ್ ಅಲಿ ಖಾನ್ ಪಟೌಡಿ ಚೊಚ್ಚಲ ಸ್ಮರಣೆಯ ಉಪನ್ಯಾಸವನ್ನು ಸುನಿಲ್ ಗವಾಸ್ಕರ್ ಅವರು ಫೆ.20 ರಂದು ಚೆನೈನ ತಾಜ್ ಕೊರಮಂಡಲ್ ಹೋಟೆಲ್‌ನಲ್ಲಿ ನಡೆಸಲಿದ್ದಾರೆ ಎಂದು ಬಿಸಿಸಿಐ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ. ಈ ವಾರ್ಷಿಕ ಉಪನ್ಯಾಸವು ಭಾರತೀಯ ಕ್ರಿಕೆಟ್ ಋತುವಿನ ಭಾಗವಾಗಿದೆ. ಈ ಒಂದು ಕಾರ್ಯಕ್ರಮ ವಿಶ್ವದ ಎಲ್ಲಾ ಉಪನ್ಯಾಸಕರಿಗೂ ಈ ವರ್ಣರಂಜಿತ ಕ್ರೀಡೆಯ ಬಗ್ಗೆ ತಮ್ಮ ಅಭಿಪ್ರಾಯವನ್ನು ವ್ಯಕ್ತಪಡಿಸಲು ಉತ್ತಮ ವೇದಿಕೆಯನ್ನು ಕಲ್ಪಿಸಿಕೊಡಲಿದೆ, ಕ್ರೀಡೆ ಹಂತ ಹಂತವಾಗಿ ಬೆಳೆಯಲು ಸಹಕಾರಿಯಾಗುತ್ತದೆ ಎಂದು ಬಿಸಿಸಿಐ ತಿಳಿಸಿದೆ.