ಶಿವಮೊಗ್ಗ: ಫೆಬ್ರವರಿ 1 ಮತ್ತು 2ರಂದು ಥೈಲ್ಯಾಂಡ್‌ನಲ್ಲಿ ನಡೆಯುವ ಫೆಸಿಫಿಕ್ ಇಂಟರ್‌ನ್ಯಾಷನಲ್  ಕರಾಟೆ ಚಾಂಪಿಯನ್ ಶಿಪ್ 2013ರಲ್ಲಿ ಶಿವಮೊಗ್ಗದ ಮೂವರು ಕರಾಟೆ ಪಟುಗಳು ಸ್ಪರ್ಧಿಸುತ್ತಿದ್ದಾರೆ.
ಕರಾಟೆ ಪಟುಗಳಾದ ಸನ್ಸೈ ಚಂದ್ರಕಾಂತ್, ರಾಜಾ ಆಗ್ರೋ ಸರ್ವಿಸ್ ಸೆಂಟರ್‌ನ ಬಸವರಾಜು, ಶಿವರಾಮಕೃಷ್ಣ ವಿವಿಧ ವಿಭಾಗಗಳಲ್ಲಿ ಸ್ಪರ್ಧಿಸುತ್ತಿದ್ದಾರೆ. ಇವರೊಂದಿಗೆ ಹಿರಿಯೂರಿನ ರಂಗಸ್ವಾಮಿ, ಗೋಕುಲ್ ಸಹ ಸ್ಪರ್ಧಿಸುತ್ತಿದ್ದಾರೆ.
ಈ ಕರಾಟೆ ಪಟುಗಳು ಕಳೆದ ತಿಂಗಳು ನಡೆದಂತಹ ರಾಷ್ಟ್ರೀಯಮಟ್ಟದ ಕರಾಟೆ ಪಂದ್ಯಾವಳಿಯಲ್ಲಿ ಆಯ್ಕೆಯಾಗಿದ್ದು, ಈ ಪಂದ್ಯಾವಳಿಯಲ್ಲಿ ಸ್ಪರ್ಧಿಸುತ್ತಿದ್ದಾರೆ. ಇವರೊಂದಿಗೆ ಭಾರತದ ಒಟ್ಟು 60 ಸ್ಪರ್ಧಾಗಳು ಪಾಲ್ಗೊಳ್ಳುತ್ತಿದ್ದು, ಒಟ್ಟು 18 ದೇಶದ ಪ್ರತಿನಿಧಿಗಳು ಭಾಗವಹಿಸುತ್ತಿದ್ದಾರೆ.
ಸುದ್ದಿಗೋಷ್ಠಿಯಲ್ಲಿ ಈ ಕುರಿತು ಮಾಹಿತಿ ನೀಡಿದ ಸನ್ಸೈ ಚಂದ್ರಕಾಂತ್, ಈ ಕ್ರೀಡಾಕೂಟದಲ್ಲಿ ಪಾಲ್ಗೊಳ್ಳುತ್ತಿರುವುದು ಹೆಮ್ಮೆ ಎನಿಸುತ್ತಿದೆ. ಸ್ಪರ್ಧೆಯಲ್ಲಿ ವಿಜೇತರಾಗುವ ವಿಶ್ವಾಸವಿದೆ ಎಂದರು.
ಇತರೆ ರಾಜ್ಯಗಳಲ್ಲಿ ಅಲ್ಲಿನ ಸರ್ಕಾರಗಳು ಕರಾಟೆ ಪಟುಗಳಿಗೆ ಪ್ರೋತ್ಸಾಹ ನೀಡುತ್ತಿದ್ದು, ಆರ್ಥಿಕ ಸಹಕಾರ ನೀಡುತ್ತಿವೆ. ಆದರೆ, ಕರ್ನಾಟಕದಲ್ಲಿ ಪ್ರೋತ್ಸಾಹದ ಕೊರತೆ ಇದೆ ಎಂದು ಅಳಲು ತೋಡಿಕೊಂಡ ಅವರು, ನಾವು ಸ್ಪರ್ಧೆಯಲ್ಲಿ ಪಾಲ್ಗೊಳ್ಳಲು ಕೆಲವೊಂದು ಸಂಘ ಸಂಸ್ಥೆಗಳು ಹಣಕಾಸಿನ ನೆರವು ಒದಗಿಸಿಕೊಟ್ಟಿವೆ ಎಂದು ಸ್ಮರಿಸಿದರು.
ಸುದ್ದಿಗೋಷ್ಠಿಯಲ್ಲಿ ಸ್ಪರ್ಧಾಗಳು ಹಾಜರಿದ್ದರು.