ಮುಂಬೈ: ಭಾರತದಲ್ಲಿ ಆರಂಭವಾಗಿರುವ ಮಹಿಳಾ ವಿಶ್ವಕಪ್ ಕ್ರಿಕೆಟ್‌ನಲ್ಲಿ ಭಾಗವಹಿಸಿರುವ ಭಾರತ ತಂಡದ ನಾಯಕತ್ವ ವಹಿಸಿರುವ ಮಿಥಾಲಿ ರಾಜ್ ಅವರು ಐಸಿಸಿ ಮಹಿಳಾ ಏಕದಿನ ರ್ಯಾಂಕಿಂಗ್‌ನಲ್ಲಿ ನಂ.1 ಪಟ್ಟಕ್ಕೇರಿದ್ದಾರೆ. ಇದರೊಂದಿಗೆ 2013ರ ಮಹಿಳಾ ವಿಶ್ವಕಪ್‌ನಲ್ಲಿ ಭಾಗವಹಿಸಲು ಮಿಥಾಲಿ ಸಿದ್ಧರಾಗಿದ್ದಾರೆ.
ಮಿಥಾಲಿ ರಾಜ್ ಅವರು 767 ರೇಟಿಂಗ್ ಪಾಯಿಂಟ್ಸ್‌ಗಳೊಂದಿಗೆ ರ್ಯಾಂಕಿಂಗ್‌ನಲ್ಲಿ ಅಗ್ರಸ್ಥಾನಕ್ಕೇರಿದ್ದಾರೆ. ಮಿಥಾಲಿಗಿಂತ 22 ರೇಟಿಂಗ್ ಪಾಯಿಂಟ್ ಕಡಿಮೆ ಹೊಂದಿರುವ ವೆಸ್ಟ್ ಇಂಡೀಸ್‌ನ ಸ್ಟ್ಯಾಫರಾನೀ ಟೇಲರ್ ಅವರು ಎರಡನೇ ಸ್ಥಾನದಲ್ಲಿದ್ದಾರೆ. ಇಂಗ್ಲೆಂಡ್‌ನ ಸರಾ ಟೇಲರ್ ಮತ್ತು ಲೇಡೀ ಗ್ರೀನ್‌ವೇ ಅವರು ಕ್ರಮವಾಗಿ ಮೂರನೇ ಮತ್ತು ನಾಲ್ಕನೇ ಸ್ಥಾನದಲ್ಲಿದ್ದಾರೆ. ನ್ಯೂಜಿಲೆಂಡ್‌ನ ಅಮಿ ಸಾಟರ್ಟ್‌ವೈಟ್ ಅವರು 5ನೇ ಸ್ಥಾನದಲ್ಲಿರುವುದರೊಂದಿಗೆ ಟಾಪ್-5 ಸ್ಥಾನ ತುಂಬಿಕೊಂಡಿದೆ.
ಇನ್ನು ಬೌಲಿಂಗ್ ವಿಭಾಗದಲ್ಲಿ 777 ರೇಟಿಂಗ್ ಪಾಯಿಂಟ್‌ಗಳನ್ನು ಹೊಂದಿರುವ ಇಂಗ್ಲೆಂಡ್‌ನ ಕೆಥರಿನ್ ಬ್ರಂಟ್ ಅವರು ಅಗ್ರ ಸ್ಥಾನ ಅಲಂಕರಿಸಿದ್ದಾರೆ. ಆದರೆ, ಬ್ರಂಟ್ ಅವರು ಆಸ್ಟ್ರೇಲಿಯಾದ ಲೀಸಾ ಸ್ಟೇಲಕರ್ ಅವರಿಂದ ಕಠಿಣ ಸ್ಪರ್ಧೆಯನ್ನು ಎದುರಿಸುತ್ತಿದ್ದಾರೆ. 764 ರೇಟಿಂಗ್ ಪಾಯಿಂಟ್‌ಗಳನ್ನು ಹೊಂದಿರುವ ಲೀಸಾ ಅವರು ಶೀಘ್ರವೇ ಅಗ್ರ ಸ್ಥಾನಕ್ಕೇರಿದರೆ, ಅಚ್ಚರಿಪಡಬೇಕಿಲ್ಲ.
ಇನ್ನು ಭಾರತದ ಜೂಲನ್ ಗೋಸ್ವಾಮಿ ಅವರು ಮೂರನೇ ಸ್ಥಾನದಲ್ಲಿದ್ದರೆ, ಆಸ್ಟ್ರೇಲಿಯಾದ ಎಲ್ಲೀಸ್ ಪೆರಿ ಅವರು ನಾಲ್ಕನೇ ಮತ್ತು ಇಂಗ್ಲೆಂಡ್‌ನ ಲೂರಾ ಮಾರ್ಷ್ ಅವರು 5ನೇ ಸ್ಥಾನದಲ್ಲಿದ್ದಾರೆ.