ನವದೆಹಲಿ: ವೇಗದ ಬೌಲಿಂಗ್ ನನಗೆ ಮುಖ್ಯ, ಲೈನ್ ಮತ್ತು ಲೆಂತ್‌ನ್ನು ನಾನು ಯಾವತ್ತೂ ಪರಿಗಣಿಸುವುದೇ ಇಲ್ಲ ಎಂದು ಭಾರತದ ಉದಯೋನ್ಮುಖ ವೇಗದ ಬೌಲರ್ ಶಮಿ ಅಹ್ಮದ್ ಬುಧವಾರ ಹೇಳಿದ್ದಾರೆ. 'ವೇಗ ಮತ್ತು ಸ್ವಿಂಗ್ ಬೌಲಿಂಗ್‌ನ ಮುಖ್ಯ ಅಂಶಗಳವಾಗಿವೆ. ಲೈನ್ ಮತ್ತು ಲೆಂತ್ ಎಂದರೆ ಏನು ಎಂಬುದು ನನಗೆ ಗೊತ್ತಿದೆ. ಆದರೆ, ವೇಗದ ಬೌಲಿಂಗ್ ಜತೆ ನಾನು ಯಾವತ್ತೂ ರಾಜಿಮಾಡಿಕೊಳ್ಳುವುದಿಲ್ಲ. ವೇಗದಲ್ಲೇ ನನ್ನ ಹೆಚ್ಚಿನ ಶಕ್ತಿ ಅಡಗಿದ್ದು, ಈ ಮಟ್ಟಕ್ಕೆ ಬೆಳೆಯಲೂ ಅದೇ ಮೂಲ ಕಾರಣವಾಗಿದೆ' ಎಂದು ಸಂದರ್ಶನವೊಂದರಲ್ಲಿ ಶಮಿ ಹೇಳಿದ್ದಾರೆ.
'ನನ್ನ ನಾಯಕ ನೀಡಿದ ಸಲಹೆಯಂತೆ ಉತ್ತಮ ಬೌಲಿಂಗ್ ಪ್ರದರ್ಶಿಸಲು ನಾನು ಪಂದ್ಯದಲ್ಲಿ ಯತ್ನಿಸಿದ್ದೇನೆ. ಪದಾರ್ಪಣೆ ಪಂದ್ಯದಲ್ಲೇ ಸತತ ನಾಲ್ಕು ಓವರ್ ಮೇಡನ್ ಮಾಡಲು ನಾವು ಮೊದಲೇ ಯೋಜನೆ ಹಾಕಿಕೊಂಡಿರಲಿಲ್ಲ. ಆದರೆ, ಅಂತಹ ಸಾಧನೆ ಮಾಡಲು ಸಾಧ್ಯವಾಗಿದ್ದು ನನಗೆ ಸಂತಸ ಉಂಟುಮಾಡಿದೆ. ನನ್ನ ಸಾಮರ್ಥ್ಯದ ಬಗ್ಗೆ ನಾನು ವಿಶ್ವಾಸ ಹೊಂದಿದ್ದು, ಕಠಿಣ ಪರಿಶ್ರಮಪಡಲು ಸಿದ್ಧವಾಗಿದ್ದೇನೆ' ಎಂದಿದ್ದಾರೆ ಶಮಿ ಅಹ್ಮದ್.