ನವದೆಹಲಿ: ಏಕಾಗ್ರತೆ ಹಾಗೂ ಸ್ಥಿರಚಿತ್ತತೆ ಯಾವುದೇ ಯಶಸ್ಸಿನ ರಹದಾರಿಯಾಗಿದ್ದು ಇದನ್ನು ಮುಂಬರುವರಿಯೋ ಒಲಿಂಪಿಕ್ಸ್ ನಲ್ಲಿ ಯಶಸ್ಸಿನ `ಬತ್ತಳಿಕೆ'ಯನ್ನಾಗಿಸಿಕೊಳ್ಳಲು ಭಾರತದ ಬಿಲ್ಲುಗಾರರು ಯೋಗ ಗುರು ಬಾಬಾ ರಾಮ್ ದೇವ್ ಅವರ ಮೊರೆ ಹೋಗಿದ್ದಾರೆ ಎಂದು `ಜೀ ನ್ಯೂಸ್' ವರದಿ ಮಾಡಿದೆ.
ಇತ್ತೀಚೆಗಷ್ಟೇ ಡೆನ್ಮಾರ್ಕ್ ನಲ್ಲಿ ಮುಕ್ತಾಯ ಕಂಡ ಆರ್ಚರಿ ವಿಶ್ವ ಚಾಂಪಿಯನ್ ಶಿಪ್‍ನಲ್ಲಿ ಯಶಸ್ವಿ ಪ್ರದರ್ಶನ ನೀಡಿದ ಭಾರತದ ಬಿಲ್ಲುಗಾರರ ಮನೋಬಲವನ್ನು ಇನ್ನಷ್ಟು ಸದೃಢಗೊಳಿಸಲು ಆರ್ಚರಿ ಅಸೋಸಿಯೇಷನ್ ಆಫ್ ಇಂಡಿಯಾ (ಎಎಐ) ನಿರ್ಧರಿಸಿದೆ.
``ಮಾನಸಿಕವಾಗಿ ಸದೃಢಗೊಳ್ಳಲು ನಮ್ಮ ಬಿಲ್ಲುಗಾರರಿಗೆ ಯೋಗ ಗುರು ಬಾಬಾ ರಾಮ್ದೇವ್ ಅವರಿಂದ ವಿಶೇಷ ಯೋಗ ತರಗತಿಗಾಗಿ ಮನವಿ ಮಾಡಿಕೊಳ್ಳಲಾಗಿದೆ. ಸ್ಟಾರ್ ಬಿಲ್ಲುಗಾರ್ತಿ ದೀಪಿಕಾ ಕುಮಾರಿ ಸಹ ಇದನ್ನು ಬಯಸಿದ್ದರು'' ಎಂದು ಎಎಐ ಅಧ್ಯಕ್ಷ ವಿಜಯ್ ಕುಮಾರ್ ಮಲ್ಹೋತ್ರಾ ತಿಳಿಸಿದ್ದಾರೆ.