ವಾಸ್ಕೋ: ಎರಡನೇ ಅವಧಿಯ ಆಟದಲ್ಲಿ ಉತ್ತಮ ಪ್ರದರ್ಶನ ನೀಡಿದ ಪುಣೆ ಎಫ್‌ಸಿ ತಂಡದ ಆಟಗಾರರು ಫೇಡರೇಶನ್ ಕಪ್ ಫುಟ್ಬಾಲ್ ಟೂರ್ನಿಯ 'ಬಿ' ಗುಂಪಿನ ಪಂದ್ಯದಲ್ಲಿ ಮೋಹನ್ ಬಗಾನ್ ಎದುರು ಡ್ರಾ ಫಲಿತಾಂಶ ಪಡೆಯಲು ಸಫಲರಾಗಿದ್ದಾರೆ.
ತಿಲಕ್ ಮೈದಾನದಲ್ಲಿ ಗುರುವಾರ ನಡೆದ ಪಂದ್ಯದಲ್ಲಿ ಪುಣೆ ಎಫ್‌ಸಿ ಮತ್ತು ಮೋಹನ್ ಬಗಾನ್ 1-1 ಗೋಲಿನಿಂದ ಡ್ರಾ ಫಲಿತಾಂಶಕ್ಕೆ ತೃಪ್ತಿ ಹೊಂದಿದವು. ಮೋಹನ್ ಬಗಾನ್ ಪ್ರಥಮಾರ್ಧದ 26ನೇ ನಿಮಿಷದಲ್ಲಿಯೇ ಪಿಯೇರಾ ಬೋಯಾ ಮೂಲಕ ಗೋಲು ಗಳಿಸಿ ಶುಭಾರಂಭ ಮಾಡಿತ್ತು.
ಆದರೆ, ಉತ್ತರಾರ್ಧದಲ್ಲಿ ಪಂದ್ಯದ 66ನೇ ನಿಮಿಷದ ಆಟದಲ್ಲಿ ರ್ಯೂಜಿ ಸುಯೋಕಾ ಪುಣೆ ಎಫ್‌ಸಿ ಪರಗೋಲುಗಳಿಸುವುದರೊಂದಿಗೆ ಅಂತಿಮವಾಗಿ ಉಭಯ ತಂಡಗಳು ಅಂಕ ಹಂಚಿಕೆಯೊಂದಿಗೆ ನಿಟ್ಟುಸಿರುಬಿಟ್ಟವು. ಈ ಡ್ರಾದಿಂದಾಗಿ ಬಗಾನ್ 2 ಅಂಕ ಹಾಗೂ ಪುಣೆ 4 ಅಂಕಗಳನ್ನು ತಲುಪಿದವು.