ಸಿಡ್ನಿ: ಆರಂಭಿಕ ಡೇವಿಡ್ ವಾರ್ನರ್ ಅವರ ಭರ್ಜರಿ ಶತಕದ ನೆರವಿನಿಂದ ಆತಿಥೇಯ ಆಸ್ಟ್ರೇಲಿಯನ್ನರು ಏಕದಿನ ತ್ರಿಕೋನ ಕ್ರಿಕೆಟ್ ಸರಣಿಯ ಮೊದಲ ಪಂದ್ಯದಲ್ಲಿ ಇಂಗ್ಲೆಂಡ್ ವಿರುದ್ಧ 3 ವಿಕೆಟ್‌ಗಳಿಂದ ಗೆಲವು ದಾಖಲಿಸಿ ಶುಭಾರಂಭ ಮಾಡಿದ್ದಾರೆ.

ಸಿಡ್ನಿ ಕ್ರಿಕೆಟ್ ಮೈದಾನದಲ್ಲಿ ಶುಕ್ರವಾರ ನಡೆದ ಪಂದ್ಯದಲ್ಲಿ ಗೆಲ್ಲಲು 235 ರನ್‌ಗಳ ಗುರಿ ಪಡೆದಿದ್ದ ಆಸ್ಟ್ರೇಲಿಯಾ ಇನ್ನೂ 10.1 ಓವರುಗಳು ಉಳಿದಿರುವಂತೆಯೇ 7 ವಿಕೆಟ್ ಕಳೆದುಕೊಂಡು ವಿಜಯದ ಕಹಳೆ ಮೊಳಗಿಸಿತ್ತು.

ಡೇವಿಡ್ ವಾರ್ನರ್ ಕೇವಲ 115 ಎಸೆತಗಳಲ್ಲಿ 18 ಬೌಂಡರಿ ಹೊಂದಿದ್ದ 127 ರನ್ ಗಳಿಸಿದರು. ಅಚ್ಚರಿ ಎಂದರೆ, ಆಸ್ಟ್ರೇಲಿಯನ್ನರು ಕೊನೆಯಘಟ್ಟದಲ್ಲಿ ಅನಗತ್ಯವಾಗಿ ವಿಕೆಟ್ ಕಳೆದುಕೊಂಡು. 199ರಿಂದ 233ರ ಮೊತ್ತದೊಳಗೆ 4 ವಿಕೆಟ್ ಒಪ್ಪಿಸಿದರು. ಆದರೆ, ಅದಾಗಲೇ ಗುರಿಯ ಸಮೀಪ ಬಂದು ನಿಂತಿದ್ದರಿಂದ ಆಸ್ಟ್ರೇಲಿಯನ್ನರ ಮೇಲೆ ಇದು ಗಂಭೀರ ಪರಿಣಾಮವನ್ನೇನೂ ಬೀರಲಿಲ್ಲ.

ಇಂಗ್ಲೆಂಡ್ ದಾಳಿ ಚುರುಕಿನಿಂದ ಕೂಡಿರಲಿಲ್ಲ. ವೋಕ್ಸ್ 4 ವಿಕೆಟ್ ಪಡೆದಿದ್ದು ಉತ್ತಮ ಸಾಧನೆಯಾಯಿತು.