ಲಾಸ್ ವೆಗಾಸ್: ಇಲ್ಲಿ ನಡೆಯುತ್ತಿರುವ ಎನ್‍ಬಿಎ ಸಮ್ಮರ್ ಲೀಗ್ ಬ್ಯಾಸ್ಕೆಟ್ ಬಾಲ್ ಟೂರ್ನಿಯಲ್ಲಿ ಭಾರತದ ಆಟಗಾರ ಸತ್ನಾಮ್ ಸಿಂಗ್ ಅವರ ತಂಡ ಡಲ್ಲಾಸ್ ಮೇವರಿಕ್ ಜಯದ ಸವಿಯುಂಡಿದೆ.

ಲಾಸ್ ಏಂಜಲೀಸ್ ಲ್ಯಾಕರ್ಸ್ ವಿರುದ್ಧ ಸೆಣಿಸಿದ ಅದು 88-86 ಅಂತರದ ರೋಚಕ ಜಯ ಸಾಧಿಸಿತು. ಈ ಪಂದ್ಯದಲ್ಲಿ ಆಡಿದ ಸತ್ನಾಮ್ ಸಿಂಗ್ ಕೇವಲ ನಾಲ್ಕು ನಿಮಿಷಗಳ ಕಾಲ ಆಡಿ,
ಒಂದು ಅಂಕ ಸಂಪಾದಿಸಿಕೊಡುವ ಮೂಲಕ ತಮ್ಮದೊಂದು ಕಾಣಿಕೆ ಸಲ್ಲಿಸಿದರು.

ಪಂದ್ಯದ ಮೊದಲ ಕ್ವಾರ್ಟರ್ ಅವಧಿಯ ಅಂತ್ಯದ ವೇಳೆಗೆ ಅಂಕಣಕ್ಕೆ ಕಾಲಿಡುವ ಅವಕಾಶ ಪಡೆದ ಸತ್ನಾಮ್, ಉತ್ತಮ ಆಟ ಪ್ರದರ್ಶಿಸಿದರು. ಎರಡನೇ ಕ್ವಾರ್ಟರ್ ಶುರುವಾದ ನಂತರ 2 ನಿಮಿಷಗಳ ಕಾಲ ಅವರು ಅಂಕಣದಲ್ಲಿದ್ದರು. ಈ ಅವಧಿಯಲ್ಲಿ ಒಂದು ಫ್ರೀ ತ್ರೋ ಮೂಲಕ ತಮ್ಮ ತಂಡಕ್ಕೆ 1 ಅಂಕ ತಂದುಕೊಟ್ಟರು. ಟೂರ್ನಿಯಲ್ಲಿ, ಈ ಹಿಂದೆ ಆಡಿದ್ದ ಎರಡೂ ಪಂದ್ಯಗಳಲ್ಲಿ ಆಡಿದ್ದ ಸತ್ನಾಮ್ ತಲಾ 4 ಅಂಕಗಳನ್ನು ಗಳಿಸಿದ್ದರು.