ಬೆಂಗಳೂರು: ತಮ್ಮ ತವರು ರಾಜ್ಯವಾದ ಮಣಿಪುರದಲ್ಲಿ  ಉಗ್ರಗಾಮಿಗಳ ಹಿಂಸಾಚಾರ ಮೇರೆ ಮೀರಿದರೆ ತಮ್ಮ ಕುಟುಂಬವನ್ನು ಬೇರೆ ರಾಜ್ಯಕ್ಕೆ ಸ್ಥಳಾಂತರಿಸುವ ಬಗ್ಗೆ ಮಾಜಿ ವಿಶ್ವ ಚಾಂಪಿಯನ್ ಬಾಕ್ಸರ್ ಮೇರಿ ಕೋಂ ಹೇಳಿದ್ದಾರೆಎಂದು ಇಂಡಿಯನ್ ಎಕ್ಸ್ ಪ್ರೆಸ್ ವರದಿ ಮಾಡಿದೆ.
ಇತ್ತೀಚೆಗಷ್ಟೇ ತಮ್ಮ ರಾಜ್ಯದಲ್ಲಿನ ಸೇನಾ ಶಿಬಿರದ ಮೇಲೆ ಉಗ್ರಗಾಮಿಗಳು ದಾಳಿ ನಡೆಸಿ 18 ಭಾರತೀಯ ಸೈನಿಕರನ್ನು ಕೊಂದಿದ್ದರು.ಇದು ಭಾರಿ ಆಂತಕವನ್ನು ಸೃಷ್ಟಿಸಿತ್ತು. ಈ ಘಟನೆ ಮೇರಿ ಕೋಮ್  ಅವರನ್ನು ನಡುಗಿಸಿದೆ. ಒಳನುಸುಳುವಿಕೆಯ ಪಿಡುಗಿನಿಂದ ತತ್ತರಿಸಿರುವ ಈಶಾನ್ಯ ರಾಜ್ಯದಲ್ಲಿ ಅಸ್ಥಿರತೆಯನ್ನು ಮೂಡಿಸಿದ್ದು, ತಮ್ಮ ಪತಿ, ಮೂವರು ಮಕ್ಕಳ ರಕ್ಷಣೆಗಾಗಿ  ಆ ರಾಜ್ಯದಿಂದ ಸ್ಥಳಾಂತರಗೊಳ್ಳುವ ಬಗ್ಗೆ ಮಾತನಾಡಿದ್ದಾರೆ.
ತಾವು ಮನೆಯಲ್ಲಿದ್ದಾಗ ಎದುರಿಸುವ ಭೀತಿಯ ಕ್ಷಣಗಳನ್ನು ಮನಬಿಚ್ಚಿ ಹೇಳಿಕೊಂಡಿರುವ ಅವರು, ನನ್ನ ಕುಟುಂಬದ ಜೊತೆಗೆ ಕಾಲ ಕಳೆಯುವ ವೇಳೆಯಲ್ಲಿ ಯಾವುದಾದರೂ ವಿಧ್ವಂಸಕ ಕೃತ್ಯಗಳ ಸುದ್ದಿ ಕಿವಿಗೆ ಬಿದ್ದರೆ ನಾನು ಮಾನಸಿಕವಾಗಿ ಆತಂಕಕ್ಕೊಳಗಾಗುತ್ತೇನೆ. ಅಲ್ಲಿಯ ಜನರೂ ಇದರಿಂದ ಬೇಸತ್ತಿದ್ದಾರೆ. ದಾಳಿಗಳು, ಕೊಲೆಗಳು, ಬಾಂಬ್ ಸ್ಪೋಟಗಳಂಥ ಕೃತ್ಯಗಳನ್ನು ಯಾರೂ ಸಹಿಸುವುದಿಲ್ಲ. ಹಾಗೆಯೇ ಮಣಿಪುರದ ಜನರೂ ಸಹ. ನಾನು ಚಿಕ್ಕವಳಿದ್ದಾಗಿನಿಂದ ಇಂಥ ಅಪಾಯಕಾರಿ ಪ್ರಾಂತ್ಯದಲ್ಲಿ ಜೀವಿಸುವುದು ಹೇಗೆಂಬುದನ್ನು ಕಲಿತಿದ್ದೇನೆ. ಆದರೂ ಒಮ್ಮೊಮ್ಮೆ ನನಗೆ ಆತಂಕವಾಗುತ್ತದೆ. ನನ್ನ ಕುಟುಂಬದ ಸುರಕ್ಷತೆಗಾಗಿ ಅವಶ್ಯಕತೆ ಕಂಡು ಬಂದಲ್ಲಿ ಆ ರಾಜ್ಯವನ್ನೇ ತೊರೆದು ಬೇರೆಡೆ ವಾಸ್ತವ್ಯ ಹೂಡುತ್ತೇನೆ, ಎಂದು ಅವರು ತಿಳಿಸಿದ್ದಾರೆ.