ನವದೆಹಲಿ: ಟೀಂ ಇಂಡಿಯಾ ನಾಯಕ ಮಹೇಂದ್ರ ಸಿಂಗ್ ಧೋನಿ ಹಾಗೂ ಬಾಂಗ್ಲಾದೇಶ ವೇಗದ ಬೌಲರ್‌ ಮುಸ್ತಫಿಜುರ್ ರಹಮಾನ್ ವಿರುದ್ಧ ಐಸಿಸಿ ನೀತಿ ಸಂಹಿತೆ ಉಲ್ಲಂಘನೆ ಆರೋಪ ಸಾಬೀತಾಗಿದ್ದು, ಇಬ್ಬರೂ ಆಟಗಾರರಿಗೆ ದಂಡ ವಿಧಿಸಲಾಗಿದೆ.
ನಿನ್ನೆ ಮೀರ್‌ಪುರ್‌ದಲ್ಲಿ ಬಾಂಗ್ಲಾದೇಶ ವಿರುದ್ಧ ನಡೆದ ಏಕದಿನ ಪಂದ್ಯದ ವೇಳೆ ಮುಸ್ತಫಿಜುರ್ ರಹಮಾನ್‌ಗೆ ಡಿಕ್ಕಿ ಹೊಡೆದಿದ್ದ ಧೋನಿಗೆ ಪಂದ್ಯದ ಸಂಭಾವನೆಯ ಶೇ.75ರಷ್ಟು ಹಾಗೂ ರಹಮಾನ್ ಗೆ ಪಂದ್ಯದ ಸಂಭಾವನೆಯ ಶೇ.50ರಷ್ಟು ದಂಡ ವಿಧಿಸಿ ಮ್ಯಾಚ್ ರೆಫರಿ ಆಂಡಿ ಪಾಯಿಕ್ರಾಫ್ಟ್ ಆದೇಶ ಹೊರಡಿಸಿದ್ದಾರೆ.
ಐಸಿಸಿ ನಿಮಯಗಳ ಪ್ರಕಾರ ಈ ಆಟಗಾರರು ಕ್ರೀಡೆಯ ನಿಯಮಗಳನ್ನು ಉಲ್ಲಂಘಿಸಿದ್ದಾರೆ ಎಂದು ಧೋನಿ ಹಾಗೂ ಮುಸ್ತಫಿಜುರ್ ರೆಹಮಾನ್‌ ಅವರಿಗೆ ದಂಡ ವಿಧಿಸಲಾಗಿದೆ.
ತಮ್ಮ ವೃತ್ತಿ ಜೀವನದಲ್ಲಿ ಇಂಥದ್ದೊಂದು ಸಂದರ್ಭಕ್ಕೆ ಎಂದೂ ಅವಕಾಶ ನೀಡದ ಧೋನಿ, ಈ ಪ್ರಕರಣದಲ್ಲಿ ಈಗ ಮುಜುಗರಕ್ಕೆ ಒಳಗಾಗಿದ್ದಾರೆ.
25ನೇ ಓವರ್‌ನ ಎರಡನೇ ಎಸೆತ ಎಸೆದಿದ್ದ ಮುಸ್ತಫಿಜುರ್, ಫೀಲ್ಡಿಂಗ್ ಮಾಡುವತ್ತ ಸಾಗಿದಾಗ ತಮ್ಮ ಭುಜದಿಂದ ಶಕ್ತಿಶಾಲಿಯಾಗಿ ಧೋನಿ ಡಿಕ್ಕಿ ಹೊಡೆದಿದ್ದರು. ಇದರಿಂದ ಗಾಯಗೊಂಡ ಬೌಲರ್‌ ಚಿಕಿತ್ಸೆಗಾಗಿ ಕೆಲಕಾಲ ಅಂಗಳದಿಂದ ಹೊರಗುಳಿದಿದ್ದರು.