ಆ್ಯಂಟ್ವೆರ್ಪ್(ಬೆಲ್ಜಿಯಂ): ಸಾಂಪ್ರದಾಯಿಕ ಪ್ರತಿಸ್ಪರ್ಧಿಗಳಾದ ಭಾರತ ಹಾಗೂ ಪಾಕಿಸ್ತಾನ ಮತ್ತೊಮ್ಮೆ ಮುಖಾಮುಖಿಯಾಗುತ್ತಿದ್ದು, ಹಾಕಿ ಪ್ರಿಯರ ನಾಡಿಮಿಡಿತವನ್ನು ಜೋರಾಗಿಸಿದೆ.
ಹಾಕಿ ವಿಶ್ವ ಲೀಗ್ ಸೆಮಿಫೈನಲ್ ನ ಗುಂಪು ಹಂತದ ಮೂರನೇ ಪಂದ್ಯದಲ್ಲಿ ಸರ್ದಾರ್ ಸಿಂಗ್ ಸಾರಥ್ಯದ ಟೀಂ ಇಂಡಿಯಾ, ಪಾಕಿಸ್ತಾನವನ್ನು ಸವಾಲಿಗೆ ದಿಟ್ಟ ಉತ್ತರ ನೀಡಲು ಸಜ್ಜಾಗಿದೆ.
ಮೊದಲ ಪಂದ್ಯದಲ್ಲಿ ಫ್ರಾನ್ಸ್ ಒಡ್ಡಿದ ಭಾರೀ ಪೈಪೋಟಿಯನ್ನು 3-2 ಗೋಲುಗಳ ಅಂತರದಿಂದ ಹತ್ತಿಕ್ಕಿದ್ದ ಭಾರತ ತಂಡ, ಬಳಿಕ ನಡೆದ ಪಂದ್ಯದಲ್ಲಿ ಪೋಲೆಂಡ್ ಎದುರು ಏಕಪಕ್ಷೀಯವಾಗಿ ಪ್ರದರ್ಶನದೊಂದಿಗೆ 3-0 ಗೋಲುಗಳಿಂದ ವಿಜೃಂಭಿಸಿತ್ತು.
ಕಳೆದ ವರ್ಷ ಭಾರತದಲ್ಲಿ ನಡೆದ ಚಾಂಪಿಯನ್ಸ್ ಟ್ರೋಫಿ ಟೂರ್ನಿಯಲ್ಲಿ ಭಾರತವನ್ನು ಕೂದಲೆಳೆಯ ಅಂತರದಿಂದ ಮಣಿಸಿ ಅಂಗಳದಲ್ಲೇ ಅಂಗಿಗಳನ್ನು ಬಿಚ್ಚಿ ಕುಣಿದಾಡಿ ವಿವಾದ ಎಬ್ಬಿಸಿದ್ದ ಪಾಕ್ ತಂಡಕ್ಕೆ ದಿಟ್ಟ ಪ್ರತ್ತ್ಯುತ್ತರ ನೀಡುವ ತವಕದಲ್ಲಿ ಸರ್ದಾರ್ ಪಡೆ ಸನ್ನದ್ಧವಾಗಿದೆ.