ಗಾಲ್ಗರಿ(ಕೆನಡಾ): ಭಾರತದ ಯಶಸ್ವಿ ಮಹಿಳಾ ಬ್ಯಾಡ್ಮಿಂಟನ್ ಜೋಡಿ ಜ್ವಾಲಾ ಗುಟ್ಟಾ ಹಾಗೂ ಅಶ್ವಿನಿ ಪೊನ್ನಪ್ಪ ಭಾನುವಾರ ತಡರಾತ್ರಿ ಮುಕ್ತಾಯಗೊಂಡ 50,000 ಡಾಲರ್ ಮೊತ್ತದ ಕೆನಡಾ ಓಪನ್ ಗ್ರ್ಯಾನ್ ಪ್ರೀ ಟೂರ್ನಿಯಲ್ಲಿ ಚಾಂಪಿಯನ್ ಎನಿಸಿದರು.
ಮಾರ್ಕಿನ್ ಮೆಕ್ಫಾಯಿಲ್ ಸೆಂಟರ್ನಲ್ಲಿ ನಡೆದ ಪ್ರಶಸ್ತಿ ಸುತ್ತಿನ ಸೆಣಸಾಟದಲ್ಲಿ ಮೂರನೇ ಶ್ರೇಯಾಂಕಿತ ಭಾರತೀಯ ಜೋಡಿ ಹಾಲೆಂಡ್ ಆಟಗಾರ್ತಿಯರಾದ ಎಫ್ಜೀ ಮುಸ್ಕೆನ್ಸ್ ಹಾಗೂ ಸೆಲೆನಾ ಪೀಕಾಫ್ ಜೋಡಿಯನ್ನು 21-19, 21-16ರ ಎರಡು ನೇರ ಗೇಮ್ಗಳಲ್ಲಿ ಮಣಿಸಿ ಪ್ರಶಸ್ತಿ ಪಡೆದರು.
ಆರಂಭದಿಂದಲೇ ಆಕ್ರಮಣಕಾರಿ ಹೋರಾಟ ನಡೆಸಿದ ಜ್ವಾಲಾ ಹಾಗೂ ಅಶ್ವಿನಿ ಪ್ರತಿಸ್ಪರ್ಧಿಗಳನ್ನು ಹೆಜ್ಜೆ ಹೆಜ್ಜೆಗೂ ಹೈರಾಣಾಗಿಸಿದರು. ಮೊದಲ ಗೇಮ್ನಲ್ಲಿ ಒಂದಷ್ಟು ಪ್ರತಿರೋಧ ಒಡ್ಡಿದ ಡಚ್ ಆಟಗಾರ್ತಿಯರು ಎರಡನೇ ಗೇಮ್ನಲ್ಲಿ ಬಹು ಸುಲಭವಾಗಿ ಮಣಿದರು.