ಸಿಡ್ನಿ: ಕ್ರಿಕೆಟ್ ವಿಶ್ವಕಪ್ ಸರಣಿಗೂ ಮುಂಚೆ ನಡೆದ ಆಸ್ಟ್ರೇಲಿಯಾ ಪ್ರವಾಸದ ದಯನೀಯ ಸೋಲಿನ ನಂತರ ಭಾರತ ಸೆಮಿಫೈನಲ್ಸ್ ತಲುಪುತ್ತದೆ ಎಂದು ಬಹಳ ಜನ ಊಹಿಸಿರಲಿಕ್ಕಿಲ್ಲ. ಆದರೆ ಆಟಗಾರರು ತಮ್ಮ ಮೇಲಿನ ನಂಬಿಕೆ ಕಳೆದುಕೊಳ್ಳುವುದಿಲ್ಲ, ಇದೆ ವಿಮರ್ಶಕರನ್ನು ಚಕಿತಗೊಳಿಸಲು ಸಹಕಾರಿಯಾಗಿದೆ ಎಂದಿದ್ದಾರೆ ವಿರಾಟ್ ಕೊಹ್ಲಿ.
"ಪ್ರಾಮಾಣಿಕವಾಗಿ ಹೇಳಬೇಕೆಂದರೆ ಬಹಳಷ್ಟು ಜನ ನಾವು ಸೆಮಿಫೈನಲ್ಸ್ ತಲುಪುತ್ತೇವೆ ಎಂದು ನಂಬಲಿಲ್ಲ. ಆದುದರಿಂದ ಬಹಳಷ್ಟು ಜನರನ್ನು ಆಶ್ಚರ್ಯಚಕಿತಗೊಳಿಸಿದ್ದೇವೆ. ಆದರೆ ನಮಗೆ ಆಶ್ಚರ್ಯವಾಗಿಲ್ಲ" ಎಂದು ಸಂದರ್ಶನವೊಂದರಲ್ಲಿ ತಿಳಿಸಿದ್ದಾರೆ.
"ನಮ್ಮ ಬಲದ ಮೇಲೆ, ನಮ್ಮ ಸಾಮರ್ಥ್ಯದ ಮೇಲೆ ನಮಗೆ ನಂಬಿಕೆ ಇತ್ತು" ಎಂದಿದ್ದಾರೆ.
ಇಲ್ಲಿಯವರೆಗೂ ವಿಶ್ವಕಪ್-೨೦೧೫ರ ಸರಣಿಯಲ್ಲಿ ಆಡಿರುವ ಯಾವ ಪಂದ್ಯವನ್ನು ಸೋಲದೆ, ಸೆಮಿಫೈನಲ್ಸ್ ತಲುಪಿರುವ ಭಾರತ ತಂಡ, ಸೆಮಿಫೈನಲ್ಸ್ ನಲ್ಲಿ ಆಸ್ಟ್ರೇಲಿಯಾ ತಂಡವನ್ನು ಮಣಿಸುವ ವಿಶ್ವಾಸದಲ್ಲಿದೆ.
"ಬ್ಯಾಟ್ಸಮನ್ ಗಳ ಉತ್ತಮ ಆಟ ತಂಡದ ಗೆಲುವಿಗೆ ಹೆಚ್ಚು ಸಹಕಾರಿಯಾಗಿದೆ ಎಂದು ವಿರಾಟ್ ತಿಳಿಸಿದ್ದಾರೆ.