ರೋಮ್ :  ಭಾರತದ ಹಿರಿಯ ಟೆನಿಸ್ ಆಟಗಾರ್ತಿ ಸಾನಿಯಾ  ಮಿರ್ಜಾ ಹಾಗೂ ಅವರು ಜೊತೆಗಾತಿ, ಸ್ವಿಡ್ಜರ್ಲೆಂಡ್‍ನ ಮಾರ್ಟಿನಾ ಹಿಂಗಿಸ್ ಜೋಡಿ, ರೋಮ್ ಮಾಸ್ಟರ್ಸ್ ಟೆನಿಸ್ ಟೂರ್ನಿಯ ಪ್ರಶಸ್ತಿ ಸುತ್ತನ್ನು ತಲುಪಿದೆ.
ಶನಿವಾರ ನಡೆದ ಮಹಿಳೆಯರ ಡಬಲ್ಸ್ ವಿಭಾಗದ ಸೆಮಿ ಫೈನಲ್ ಪಂದ್ಯದಲ್ಲಿ ಈ ಜೋಡಿ,  ಫ್ರಾನ್ಸ್ ನ  ಕ್ಯಾರೊಲಿನ್ ಗಾರ್ಸಿಯಾ ಹಾಗೂ ಸ್ಲೊವಾಕಿಯಾದ ಕಟಾರಿನಾ ಸ್ರೆಬೊಟ್ನಿಕ್ ಜೋಡಿಯನ್ನು 6-2, 7-6 (7--5) ಸೆಟ್‍ಗಳ ಅಂತರದಲ್ಲಿ ಪರಾಭವಗೊಳಿಸಿತು.  ಸುಮಾರು 27 ನಿಮಿಷಗಳ ಕಾಲ ನಡೆದ ಪಂದ್ಯದಲ್ಲಿ ಮೊದಲ ಸೆಟ್ ಅನ್ನು ಅನಾಯಾಸವಾಗಿ ಗೆದ್ದ ಸಾನಿಯಾ-ಹಿಂಗಿಸ್ ಜೋಡಿಯು, ಎರಡನೇ ಸೆಟ್‍ನಲ್ಲಿ ಎದುರಾಳಿ ಜೋಡಿಯಿಂದ ತೀವ್ರ ಪ್ರತಿರೋಧ ಎದುರಿಸಬೇಕಾಯಿತು. ಆದರೂ, ಮಣಿಯದೇ ತೀವ್ರ ಪೈಪೋಟಿ ನೀಡಿದ ಫಲವಾಗಿ, ದ್ವಿತೀಯ ಸೆಟ್ ಟೈಬ್ರೇಕರ್ ಗೆ ಬಂದು ನಿಂತಿತು. ಆನಂತರ ಮುಂದುವರಿದ ಪಂದ್ಯದಲ್ಲಿ ಆಕ್ರಮಣಕಾರಿ ಆಟ ಪ್ರದರ್ಶಿಸಿದ ಸಾನಿಯಾ-ಹಿಂಗಿಸ್, ಈ ಸೆಟ್‍ನೊಂದಿಗೆ ಪಂದ್ಯವನ್ನೂ ಗೆಲ್ಲುವಲ್ಲಿ ಯಶಸ್ವಿಯಾ ದರು.


ಪ್ರಶಸ್ತಿ ಸುತ್ತಿನಲ್ಲಿ ಹಂಗೇರಿ-ಫ್ರಾನ್ಸ್ ನ  ಜೋಡಿಯಾದ ಟಿಮಿಯಾ  ಬ್ಯಾಬೊಸ್ ಹಾಗೂ ಕ್ರಿಸ್ಟಿನಾ ಮ್ಲಾಡೆನೊವಿಕ್ ಜೋಡಿಯನ್ನು ಎದುರಿಸಲಿರುವ ಭಾರತ-ಸ್ವಿಸ್ ಜೋಡಿ, ಟ್ರೋಫಿಯೊಂದಿಗೆ ಸುಮಾರು 23 ಕೋಟಿ 76 ಲಕ್ಷ ರು. ಮೊತ್ತದ ಬಹುಮಾನವನ್ನು ಪಡೆಯುವ ಹೊಸ್ತಿಲಲ್ಲಿ ನಿಂತಿದೆ.