ಅಬುದಾಬಿ: ಪಾಕಿಸ್ತಾನದ ಹಿರಿಯ ಬ್ಯಾಟ್ಸ್‌ಮನ್‌ ಯೂನಿಸ್ ಖಾನ್ ಏಕದಿನ ಅಂತಾರಾಷ್ಟ್ರೀಯ ಕ್ರಿಕೆಟ್ ಗೆ ವಿದಾಯ ಹೇಳಿದ್ದಾರೆ.
ಇಂಗ್ಲೆಂಡ್‌ ವಿರುದ್ಧದ ಮೊದಲ ಹಗಲು-ರಾತ್ರಿ ಏಕದಿನ ಅಂತಾರಾಷ್ಟ್ರೀಯ ಪಂದ್ಯವು ತನ್ನ ಏಕದಿನ ಕ್ರಿಕೆಟ್ ಜೀವನದ ಕೊನೆಯ ಪಂದ್ಯವಾಗಲಿದೆ ಎಂದು ಹೇಳಿದ್ದಾರೆ.
ಅಂತಾರಾಷ್ಟ್ರೀಯ ಕ್ರಿಕೆಟ್ ನಲ್ಲಿ ಹದಿನೈದು ವರ್ಷ ಕಳೆದಿರುವ ಕ್ರಿಕೆಟಿಗನಿಗೆ ಯಾವಾಗ ತಾನು ವಿದಾಯ ಹೇಳಬೇಕು ಎಂಬುದನ್ನು ನಿರ್ಧರಿಸುವುದು ತುಂಬಾ ಕಷ್ಟ ಎಂದು ಯೂನಿಸ್ ಖಾನ್ ತಿಳಿಸಿದ್ದಾರೆ. ಏಕದಿನ ಹಾಗೂ ಟಿ-20 ಕ್ರಿಕೆಟ್‌ನಿಂದ ವಿದಾಯ ಹೇಳುವ ನಿರ್ಧಾರ ಕೈಗೊಳ್ಳಲು ನನಗೆ ಸಾಧ್ಯವಾಗಿದೆ ಎಂದು ಯೂನಿಸ್ ಹೇಳಿದರು.
ಈ ವರ್ಷದ ಆದಿಯಲ್ಲಿ ಆಸ್ಟ್ರೇಲಿಯ ಮತ್ತು ನ್ಯೂಜಿಲೆಂಡ್‌ನ‌ಲ್ಲಿ ನಡೆದಿದ್ದ ಏಕದಿನ ವಿಶ್ವಕಪ್‌ ನಂತರದ ಪಂದ್ಯಗಳಿಗೆ ಪಾಕ್‌ ಕ್ರಿಕೆಟ್ ಆಯ್ಕೆಗಾರರು ಯೂನಿಸ್ ಅವರನ್ನು ಕಡೆಗಣಿಸಿದ್ದರು. ಆಶ್ಚರ್ಯಕರವೆಂಬಂತೆ ಇದೀಗ ಇಂಗ್ಲಂಡ್‌ ವಿರುದ್ಧದ ನಾಲ್ಕು ಪಂದ್ಯಗಳ ಏಕದಿನ ಅಂತಾರಾಷ್ಟ್ರೀಯ ಕ್ರಿಕೆಟ್ ಸರಣಿಗೆ ಆಯ್ಕೆಗಾರರು ಯೂನಿಸ್ ಅವರನ್ನು ಮರಳಿ ತಂಡಕ್ಕೆ ಕರೆಸಿಕೊಂಡಿತ್ತು.
ಯೂನಿಸ್ ಅವರ ಪಾಲಿಗೆ ಇಂಗ್ಲಂಡ್‌ ಎದುರಿನ ಮೊದಲ ಏಕದಿನ ಪಂದ್ಯವು 265ನೇ ಪಂದ್ಯವಾಗಲಿದೆ. 2000 ಇಸವಿಯ ಫೆಬ್ರವರಿಯಲ್ಲಿ ಕರಾಚಿಯಲ್ಲಿ ಲಂಕೆಯ ವಿರುದ್ಧ ಪಂದ್ಯದ ಮೂಲಕ ಯೂನಿಸ್ ಖಾನ್ ಏಕದಿನ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದರು.