ಚೀನಾ: ಭಾರತದ ಆಟಗಾರ್ತಿ ಸೈನಾ ನೆಹ್ವಾಲ್ ಚೀನಾ ಓಪನ್ ಸೂಪರ್ ಸರಣಿ ಬ್ಯಾಡ್ಮಿಂಟನ್ ಟೂರ್ನಿಯ ಮಹಿಳಾ ಸಿಂಗಲ್ಸ್‌ ವಿಭಾಗದ ಫೈನಲ್ ಸುತ್ತು ಪ್ರವೇಶಿಸಿದ್ದಾರೆ.
ಹೈಕ್ಸಿಯಾ ಒಲಿಂಪಿಕ್ ಸ್ಪೋರ್ಟ್‌ ಕೇಂದ್ರದಲ್ಲಿ ನಡೆದ ಸೆಮಿಫೈನಲ್‌ ಪಂದ್ಯದಲ್ಲಿ ಸೈನಾ 21–13, 21–18ರಲ್ಲಿ ಚೀನಾದ ಯಿಹಾನ್ ವಾಂಗ್ ಅವರನ್ನು ಮಣಿಸಿದರು.
ಟೂರ್ನಿಯಲ್ಲಿ ಅಗ್ರ ಶ್ರೇಯಾಂಕ ಪಡೆದಿರುವ ಸೈನಾ ಕೇವಲ 42 ನಿಮಿಷಗಳಲ್ಲಿ ಗೆಲುವು ಒಲಿಸಿಕೊಂಡರು. ಹೈದರಾಬಾದ್‌ನ ಈ ಆಟಗಾರ್ತಿಗೆ ವಿಶ್ವ ಮಾಜಿ ನಂಬರ್ 1 ಆಟಗಾರ್ತಿ ವಾಂಗ್ ವಿರುದ್ಧ ದೊರೆತ ಸತತ ಮೂರನೇ ಗೆಲುವು ಇದಾಗಿದೆ. ಈ ಮೂಲಕ ತಮ್ಮ ವಾಂಗ್ ವಿರುದ್ಧದ ಸೋಲಿನ ಅಂತರವನ್ನು 4–9ಕ್ಕೆ ಉತ್ತಮ ಪಡಿಸಿಕೊಂಡರು.
ವಿಶ್ವ ಅಗ್ರ ಎರಡನೇ ಕ್ರಮಾಂಕದ ಆಟಗಾರ್ತಿ ಸೈನಾ ಭಾನುವಾರ ನಡೆಯಲಿರುವ ಪ್ರಶಸ್ತಿ ಸುತ್ತಿನಲ್ಲಿ ಒಲಿಂಪಿಕ್ ಚಾಂಪಿಯನ್‌ ಚೀನಾದ ಲೀ ಕ್ಸುರೆಯಿ ಅವರ ಸವಾಲು ಎದುರಿಸಲಿದ್ದಾರೆ. ಲೀ ಅವರು ಸೈನಾ ವಿರುದ್ಧ 9–2 ಗೆಲುವಿನ ಉತ್ತಮ ದಾಖಲೆ ಹೊಂದಿದ್ದಾರೆ.
25 ವರ್ಷದ ಸೈನಾ ಸೆಮಿಫೈನಲ್‌ ಪಂದ್ಯದ ವೇಳೆ ಅಂಗಳದಲ್ಲಿ ಮಿಂಚು ಹರಿಸಿದರು. ಅವರ ಚುರು‌‌ಕುತನ, ಚಲನೆ, ವೇಗ ಹಾಗೂ ಸ್ಮ್ಯಾಷ್‌ಗಳ ಎದುರು ತಕ್ಕ ಪ್ರದರ್ಶನ ತೋರುವಲ್ಲಿ ವಾಂಗ್ ವಿಫಲರಾದರು.
ಮೊದಲ ಗೇಮ್‌ನಲ್ಲಿ ಬಿರುಸಿನ ಆಟಕ್ಕೆ ಒತ್ತು ನೀಡಿದ ಸೈನಾಗೆ ಎದುರಾಳಿ ವಾಂಗ್ ಕೂಡ ತಕ್ಕ ಪೈಪೋಟಿ ಒಡ್ಡಿದರು. ಆದರೆ 14–13ರಲ್ಲಿ ಮುನ್ನಡೆ ಪಡೆದ ಬಳಿಕ ಸತತ ಏಳು ಪಾಯಿಂಟ್‌ ಬಾಚಿದ ಸೈನಾ ಗೇಮ್‌ ಜಯಗಳಿಸಿದ್ದರು.