ಫಾಟೊರ್ಡಾ: ಆರಂಭಿಕ ಪಂದ್ಯದಲ್ಲಿ ಗೆದ್ದು ಆತ್ಮ ವಿಶ್ವಾಸದೊಂದಿಗೆ ಕಣಕ್ಕಿಳಿದಿದ್ದ ಎಫ್ ಸಿ ಗೋವಾ ಮತ್ತು ಅಟ್ಲೆಟಿಕೊ ಡಿ ಕೋಲ್ಕತಾ ತಂಡಗಳು ತೀವ್ರ ಪೈಪೋಟಿಯ ನಡುವೆ ಡ್ರಾ ಫಲಿತಾಂಶಕ್ಕೆ ತೃಪ್ತಿಪಟ್ಟಿವೆ. 

ಬುಧವಾರ ಇಲ್ಲಿನ ಜವಾಹರ್‍ಲಾಲ್ ನೆಹರು ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಅಟ್ಲೆಟಿಕೊ ಡಿ ಕೋಲ್ಕತಾ ತಂಡ ಆತಿಥೇಯ ಎಫ್ ಸಿ ಗೋವಾ ವಿರುದ್ಧ 1-1 ಗೋಲುಗಳ ಡ್ರಾ ಸಾಧಿಸಿವೆ. ಆ ಮೂಲಕ ಉಭಯ ತಂಡಗಳು ತಲಾ 1 ಅಂಕಗಳನ್ನು ಹಂಚಿಕೊಂಡವು. ಆರಂಭಿಕ ಪಂದ್ಯಗಳಲ್ಲಿ ಅರ್ಹ ಗೆಲವು ಸಂಪಾದಿಸಿದ್ದ ಈ ತಂಡಗಳ ಸೆಣಸು ಸಮಬಲರ ಕಾದಾಟವಾಗಿ ಬಿಂಬಿತವಾಗಿತ್ತು. 

ಅಟ್ಲೆಟಿಕೊ ಡಿ ಕೋಲ್ಕತಾ ತಂಡದ ಪರ ಅರಾಟ ಇಜುಮಿ (13ನೇ) ಎಫ್ ಸಿ ಗೋವಾ ಪರ ಕೀನನ್ ಅಲ್ಮೆಡಾ (81ನೇ) ಗೋಲು ದಾಖಲಿಸಿದರು. ಪಂದ್ಯದಲ್ಲಿ ಆಟಗಾರರ ನಡುವಣ ತಿಕ್ಕಾಟ ಹೆಚ್ಚಾಗಿತ್ತು. ಪರಿಣಾಮ ಪಂದ್ಯದಲ್ಲಿ 10 ಹಳದಿ ಕಾರ್ಡ್ ಹಾಗೂ 1 ರೆಡ್ ಕಾರ್ಡ್‍ಗಳು ಹೊರ ಬಂದವು. ಅಟ್ಲೆಟಿಕೊ ಶುಭಾರಂಭ ಪಂದ್ಯದ 13ನೇ ನಿಮಿಷದಲ್ಲಿ ಜಾವಿ ಲಾರಾ ಅವರಿಂದ ಬಂದ ಚೆಂಡನ್ನು ಚುರುಕಿನ ಪ್ರದ್ರಶನದ ಮೂಲಕ ಎದುರಾಳಿ ತಂಡದ ಆಟಗಾರರ ಕಣ್ತಪ್ಪಿಸಿದ ಅರಾಟ ಇಜುಮಿ ತಂಡಕ್ಕೆ ಆರಂಭಿಕ ಗೋಲು ದಾಖಲಿಸಿದರು. 81ನೇ ನಿಮಿಷದಲ್ಲಿ ಸಿಕ್ಕ ಅವಕಾಶವನ್ನು ಸದ್ಬಳಕೆ ಮಾಡಿಕೊಂಡ ಗೋವಾ ತಂಡ ಪಂದ್ಯದಲ್ಲಿ ಸಮಬಲ ಸಾಧಿತು.