ವಿಶ್ವ ಫುಟ್ಬಾಲ್‍ನ ಜೀವಂತ ದಂತಕತೆ ಬ್ರೆಜಿಲ್‍ನ ಪೀಲೆಗೆ ಈ ಬಾರಿ ಅವಧಿಗೂ ಮುನ್ನವೇ ಹುಟ್ಟುಹಬ್ಬ ಆಚರಿಸಿಕೊಳ್ಳುವ ಸಂಭ್ರಮ. ಈ ಸಂತಸದ ಸಮಯಕ್ಕೆ ಕೋಲ್ಕತಾ ನಗರಿ ಸಾಕ್ಷಿಯಾಯಿತು. 38 ವರ್ಷಗಳ ಬಳಿಕ ಐತಿಹಾಸಿಕ ಭಾರತ ಪ್ರವಾಸ ಕೈಗೊಂಡಿರುವ ಪೀಲೆ ಇದೇ ತಿಂಗಳು 23ಕ್ಕೆ 75ನೇ ವಸಂತಕ್ಕೆ ಕಾಲಿರಿಸಲಿದ್ದರೂ, ಸದ್ಯದಲ್ಲೇ ಸ್ವದೇಶಕ್ಕೆ ತೆರಳುವ ಹಿನ್ನೆಲೆಯಲ್ಲಿ ಪೀಲೆಗೆ ಭಾರತದಲ್ಲೇ ಮಂಗಳವಾರ ಈ ಹುಟ್ಟುಹಬ್ಬದ ಸಂಭ್ರವನ್ನು ಆಚರಿಸಿಕೊಳ್ಳುವಂತಾಯಿತು.

ಪೀಲೆಯ ಜೀವನಚರಿತ್ರೆ ``ಪೀಲೆ: ಬರ್ತ್ ಆಫ್  ಲೆಜೆಂಡ್''ಗೆ ಸಂಗೀತ ಸಂಯೋಜಿಸಿರುವ ಆಸ್ಕರ್ ಪ್ರಶಸ್ತಿ ವಿಜೇತ ಸಂಗೀತ ನಿರ್ದೇಶಕ ಎ.ಆರ್. ರೆಹಮಾನ್ `ಹ್ಯಾಪಿ ಬರ್ತ್‍ಡೇ' ಹಾಡನ್ನು ಹಾಡಿದರೆ ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ಸೌರವ್ ಗಂಗೂಲಿ ಅದಕ್ಕೆ ಕೈಚಪ್ಪಾಳೆಯ ಸಾಥ್ ನೀಡಿದರು. 1970ರ ವಿಶ್ವಕಪ್ ಗೆದ್ದ ಸವಿನೆನಪಿನಲ್ಲಿ ನಿರ್ಮಿತಿಯಾಗಿದ್ದ `ಜೂಲ್ಸ್ ರಿಮೆಟ್ ಟ್ರೋಫಿ' ಮಾದರಿಯ ಕೇಕ್ ಕಟ್ ಮಾಡಿದ ಪೀಲೆ, ಅನಿರೀಕ್ಷಿತವಾಗಿ ಏರ್ಪಾಟಾಗಿದ್ದ ಈ ಹುಟ್ಟುಹಬ್ಬ ಕಾರ್ಯಕ್ರಮದಿಂದ ದಿಗ್ಭ್ರಮೆಗೊಂಡು ಭಾವೋದ್ವೇಗಕ್ಕೆ
ಒಳಗಾಗಿ, ``ಇಂಥದ್ದೊಂದು ವಿಶೇಷ ದಿನ ಕರುಣಿಸಿದ ದೇವರಿಗೆ ನಾನು ಧನ್ಯವಾದ ಸಲ್ಲಿಸುತ್ತೇನೆ'' ಎಂದು ಉದ್ಗರಿಸಿದರು.  ಪ.ಬಂಗಾಳ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಸೇರಿದಂತೆ ಸೇರಿದ್ದ ಪ್ರತಿಯೋರ್ವರಿಗೂ ಕೃತಜ್ಞತೆ ಸಲ್ಲಿಸಿದರು.