ಪುಣೆ: ಪಂದ್ಯ ಶುರುವಾದ ಎರಡನೇ ನಿಮಿಷದಲ್ಲಿ ಜಾಕಿಚಾಂದ್ ಬಾರಿಸಿದ ಏಕೈಕ ಗೋಲಿನ ನೆರವಿನಿಂದ ಶನಿವಾರ ನಡೆದ ಇಂಡಿಯನ್ ಸೂಪರ್ ಲೀಗ್ (ಐಎಸ್ಎಲ್) ಟೂರ್ನಿಯ 14ನೇ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಅಟ್ಲೆಟಿಕೊ ಡಿ ಕೋಲ್ಕತಾ ತಂಡವನ್ನು 1-0 ಗೋಲಿನಿಂದ ಪುಣೆ ಎಫ್ ಸಿ ಮಣಿಸಿತು.

ಇಲ್ಲಿನ ಶಿವಛತ್ರಪತಿ ಕ್ರೀಡಾ ಸಂಕೀರ್ಣದಲ್ಲಿ ನಡೆದ ಪಂದ್ಯದಲ್ಲಿ ಸಂಪೂರ್ಣ ಪ್ರಾಬಲ್ಯ ಮೆರೆದ ಪುಣೆ ಎಫ್ ಸಿ ಆಟಗಾರರು, ಮೊದಲ ಹಂತದಲ್ಲಿಯೇ ಸಿಕ್ಕ ಗೋಲಿನಿಂದ ಪಂದ್ಯದಾದ್ಯಂತ ಹಿಡಿತ ಸಾಧಿಸಿದರು. ಈ ಗೆಲುವಿನಿಂದಾಗಿ ಪುಣೆ ಎಫ್ ಸಿ ಅಂಕಪಟ್ಟಿಯಲ್ಲಿ ಒಟ್ಟು 9 ಅಂಕಗಳೊಂದಿಗೆ ಅಗ್ರಸ್ಥಾನಕ್ಕೆ ಲಗ್ಗೆ ಹಾಕಿದರೆ, ಆಘಾತಕಾರಿ ಸೋಲಿನಿಂದಾಗಿ ಕೋಲ್ಕತಾ ತಂಡ 2ನೇ ಸ್ಥಾನಕ್ಕೆ ಕುಸಿಯಿತು. ಭಾನುವಾರ ಕೊಚ್ಚಿಯಲ್ಲಿ ಡೆಲ್ಲಿ-ಕೇರಳ ತಂಡಗಳು ಸೆಣಸಲಿವೆ.