ಸಿಂಗಾಪುರ: ವಿಶ್ವದ ಅಗ್ರಶ್ರೇಯಾಂಕಿತೆ ರಷ್ಯಾದ ತಾರೆ ಮಾರಿಯಾ ಶರಪೋವಾ, ಇಲ್ಲಿ ನಡೆಯುತ್ತಿರುವ ಡಬ್ಲ್ಯುಟಿಎ ಟೂರ್ ಫೈನಲ್ಸ್‌ನ ಮಹಿಳಾ ಸಿಂಗಲ್ಸ್‌ನಲ್ಲಿ ಹ್ಯಾಟ್ರಿಕ್ ಜಯ ದಾಖಲಿಸಿದ್ದಾರೆ.

ರೌಂಡ್ ರಾಬಿನ್ ಮಾದರಿಯ ಟೂರ್ನಿಯ ಮೂರನೇ ಪಂದ್ಯದಲ್ಲಿ ಮಿಂಚಿದ 3ನೇ ಶ್ರೇಯಾಂಕಿತೆ ಶರಪೋವಾ, 7-5, 6-1 ಅಂತರದ ನೇರ ಸೆಟ್‌ಗಳಿಂದ ಅಮೆರಿಕ ಓಪನ್ ಚಾಂಪಿಯನ್ ಇಟಲಿಯ ಫ್ಲಾವಿಯಾ ಪೆನೆಟಾ ಅವರನ್ನು ಬಗ್ಗು ಬಡಿದರು.

ದಿನದ ಮತ್ತೊಂದು ಸಿಂಗಲ್ಸ್ ಪಂದ್ಯದಲ್ಲಿ ಗಮನ ಸೆಳೆದ ಪೋಲೆಂಡಿನ ಆಗ್ನೆಸ್ಕಾ ರಾಡ್ವಾಂಸ್ಕಾ, 7-6(7/5), 6-1 ಅಂತರದ ನೇರ ಸೆಟ್‌ಗಳಿಂದ ಅಗ್ರ ಶ್ರೇಯಾಂಕಿತೆ ರೊಮೇನಿಯಾದ ಸಿಮೋನಾ ಹ್ಯಾಲೆಪ್‌ಗೆ ಆಘಾತ ನೀಡಿದರು.

ಮಹಿಳಾ ಡಬಲ್ಸ್‌ನಲ್ಲಿ ಅಗ್ರ ಶ್ರೇಯಾಂಕ ಪಡೆದಿರುವ ಭಾರತದ ಸಾನಿಯಾ ಮಿರ್ಜಾ ಮತ್ತು ಸ್ವಿಜರ್ಲೆಂಡಿನ ಮಾರ್ಟಿನಾ ಹಿಂಗಿಸ್ ಜೋಡಿ 6-3, 6-4 ನೇರ ಸೆಟ್‌ಗಳಿಂದ ಏಳನೇ ಶ್ರೇಯಾಂಕಿತ ಜೆಕ್ ಗಣರಾಜ್ಯದ ಆ್ಯಂಡ್ರೇಯ ಹವಾಕೊವಾ ಮತ್ತು ಲೂಸಿ ಹ್ರಾಡೆಕಾ ಜೋಡಿ ವಿರುದ್ಧ ಜಯ ದಾಖಲಿಸಿದೆ.