ಕರಾಚಿ: ಭಾರತ-ಪಾಕ್ ದ್ವಿಪಕ್ಷೀಯ ಸರಣಿ ನಡೆಯದಿದ್ದರೂ ಪರ್ವಾಗಿಲ್ಲ. ನಾವೆಂದಿಗೂ ಭಾರತ ಮುಂದೆ ಮಂಡಿಯೂರಲ್ಲ ಎಂದು ಪಾಕಿಸ್ತಾನ ಕ್ರಿಕೆಟ್ ಬೋರ್ಡ್(ಪಿಸಿಬಿ) ಅಧ್ಯಕ್ಷ ಶಹರ್ ಯಾರ್ ಖಾನ್ ಹೇಳಿದ್ದಾರೆ. 

ಭಾರತ-ಪಾಕ್ ಸರಣಿ ನಡೆಯುವುದಕ್ಕೆ ಶಹರ್ ಯಾರ್ ಖಾನ್ ಇನ್ನಿಲ್ಲದ ಪ್ರಯತ್ನ ಮಾಡಿದ್ದರು. ಆದರೆ ಈಗ ಅನೇಕ ವರ್ಷಗಳ ಕಾಲ ಸರಣಿ ನಡೆದೇ ಇಲ್ಲ.  ದ್ವಿಪಕ್ಷೀಯ ಸರಣಿ ನಡೆಯದಿದ್ದರೆ ಅದೇನೂ ದೊಡ್ಡ ವಿಷಯವಲ್ಲ ಎಂದು ಈಗ ರಾಗ ಎಳೆದಿದ್ದಾರೆ. 

ಇದೇ ವೇಳೆ ಶಹರ್‌ಯಾರ್ ತಾವು ಮಾಜಿ ಟೆಸ್ಟ್ ನಾಯಕ ಜಹೀರ್ ಅಬ್ಬಾಸ್ ಅವರಿಗೆ ತಮ್ಮ ಪ್ರಭಾವ ಬೀರಿ ಭಾರತದ ಮಂಡಳಿಗೆ ಸರಣಿ ಆಡುವಂತೆ ಮನದಟ್ಟು ಮಾಡಬೇಕೆಂದು ತಾವು ಕೇಳಿರಲಿಲ್ಲ ಎಂದೂ ಸ್ಪಷ್ಟಪಡಿಸಿದರು. ಜಹೀರ್ ಅವರು ಐಸಿಸಿ ಅಧ್ಯಕ್ಷರಾಗಿ ಭಾರತಕ್ಕೆ ತೆರಳಿದ್ದರೇ ಹೊರತು ಪಿಸಿಬಿಯ ಸಂದೇಶಕಾರರಾಗಿ ತೆರಳಿರಲಿಲ್ಲ.  ಪಾಕ್-ಭಾರತ ಸರಣಿಯ ಪುನಶ್ಚೇತನಕ್ಕೆ ಜಹೀರ್ ನೆರವನ್ನು ನಾವು ಕೋರಿರಲಿಲ್ಲ. ಅವರು ಐಸಿಸಿ ಅಧ್ಯಕ್ಷರಾಗಿ ಭಾರತಕ್ಕೆ ತೆರಳಿದ್ದರು ಎಂದು ಮಾಹಿತಿ ನೀಡಿದರು.