ಮೊನಾಕೊ: ರಿಯಲ್ ಮಾಡ್ರಿಡ್ ನ ಸೂಪರ್ ಸ್ಟಾರ್ ಕ್ರಿಸ್ಟಿಯಾನೊ ರೊನಾಲ್ಡೊ, ಐರೋಪ್ಯ ಫುಟ್‌ಬಾಲ್ ಸಂಘಗಳ ಒಕ್ಕೂಟ(ಯುಇಎಫ್ಎ) ದ ಶ್ರೇಷ್ಠ ಆಟಗಾರ ಪ್ರಶಸ್ತಿಯನ್ನು ಗೆದ್ದಿದ್ದಾರೆ.
ಮ್ಯಾಡ್ರಿಡ್ ಕ್ಲಬ್ ತಂಡದ ಮತ್ತಿಬ್ಬರು ಆಟಗಾರರಾದ ಗರೆಥ್ ಬೇಲ್ ಮತ್ತು ಅಟ್ಲೆಟಿಕೊ ಮ್ಯಾಡ್ರಿಡ್ ನ ಆಂಟೋನಿ ಗ್ರಿಯೇಜ್ ಮನ್ ಅವರನ್ನು ಹಿಂದಿಕ್ಕಿ ರೊನಾಲ್ಡೊ ಈ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ಎರಡನೇ ಬಾರಿ ಈ ಪ್ರಶಸ್ತಿಯನ್ನು ಗೆದ್ದಿರುವುದರ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ರೊನಾಲ್ಡೊ, ಪ್ರಶಸ್ತಿ ಗೆದ್ದಿರುವುದಕ್ಕೆ ಅತ್ಯಂತ ಸಂತಸವಾಗುತ್ತಿದೆ. ಆದರೆ ಉಳಿದ ಇಬ್ಬರೂ ಆಟಗಾರರು ಪ್ರಶಸ್ತಿಗೆ ಸಮಾನವಾಗಿ ಅರ್ಹರಾಗಿದ್ದರು ಎಂದು ಹೇಳಿದ್ದಾರೆ.
2013-14 ನೇ ಸಾಲಿನಲ್ಲೂ ಈ ಪ್ರಶಸ್ತಿಗೆ ಆಯ್ಕೆಯಾಗಿದ್ದ ರೆನಾಲ್ಡೊ, ಎರಡನೇ ಬಾರಿಗೆ ಪ್ರಶಸ್ತಿ ಗೆದ್ದುಕೊಳ್ಳುವ ಮೂಲಕ ಲಿಯೊನೆಲ್ ಮೆಸ್ಸಿ(2 ಬಾರಿ) ಸಾಧನೆಯನ್ನು ಸರಿಗಟ್ಟಿದ್ದಾರೆ. ಫೀಫಾದ ಕಳೆದ ಸೀಸನ್ ನಲ್ಲಿ ಯುರೋಪಿಯನ್ ಚಾಂಪಿಯನ್ಶಿಪ್ ಹಾಗೂ ಚಾಂಪಿಯನ್ಸ್ ಲೀಗ್ ಪ್ರಶಸ್ತಿ ಜಯಿಸಲು ರಿಯಲ್ ಮ್ಯಾಡ್ರಿಡ್ ಹಾಗೂ ಪೋರ್ಚುಗಲ್ ತಂಡಕ್ಕೆ ರೊನಾಲ್ಡೊ ನೆರವಾಗಿದ್ದರು.ಜುಲೈನಲ್ಲಿ ನಡೆದ ಯುರೋ 2016ರಲ್ಲಿ ಪೋರ್ಚುಗಲ್ ತಂಡ ರೊನಾಲ್ಡೊ ನಾಯಕತ್ವದಲ್ಲಿ ಪ್ರಶಸ್ತಿ ಗೆದ್ದುಕೊಂಡಿತ್ತು. ಯುಇಎಫ್‌ಎನ 55 ಸದಸ್ಯ ರಾಷ್ಟ್ರಗಳ ಪತ್ರಕರ್ತರು ಪ್ರಶಸ್ತಿ ಆಯ್ಕೆಗೆ ಮತದಾನ ಮಾಡಿದ್ದು, ಗುರುವಾರ ನಡೆದ ಚಾಂಪಿಯನ್ಸ್ ಲೀಗ್ ಡ್ರಾ ಪ್ರಕ್ರಿಯೆ ವೇಳೆ ಪ್ರಶಸ್ತಿ ವಿಜೇತರ ಹೆಸರನ್ನು ಪ್ರಕಟಿಸಲಾಗಿದೆ.