ಹೈದರಾಬಾದ್: ಸೇವಾ ತೆರಿಗೆ ಪಾವತಿಸದ್ದಕ್ಕಾಗಿ ಟೆನಿಸ್ ಆಟಗಾರ್ತಿ ಸಾನಿಯಾ ಮಿರ್ಜಾ ಅವರಿಗೆ ಸೇವಾ ತೆರಿಗೆ ಇಲಾಖೆ ನೊಟೀಸ್ ಕಳುಹಿಸಿದೆ.

ಸೇವಾ ತೆರಿಗೆ ಇಲಾಖೆಯ ಪ್ರಧಾನ ಆಯುಕ್ತ ಸಾನಿಯಾ ಮಿರ್ಜಾ ಅವರಿಗೆ ಮೊನ್ನೆ 6ನೇ ತಾರೀಖಿನಂದು ಸಮನ್ಸ್ ಜಾರಿ ಮಾಡಿದ್ದು ಫೆಬ್ರವರಿ 16ರೊಳಗೆ ಖುದ್ದಾಗಿ ಅಥವಾ ಸಂಬಂಧಪಟ್ಟ ಏಜೆಂಟರ್ ಇಲಾಖೆಯ ಮುಂದೆ ಹಾಜರಾಗುವಂತೆ ಸೂಚಿಸಿದ್ದಾರೆ.

1994ರ ಹಣಕಾಸು ಕಾಯ್ದೆ ನಿಬಂಧನೆಯನ್ನು ಉಲ್ಲಂಘಿಸಿದವರು,  ಸೇವಾ ತೆರಿಗೆ ಕಟ್ಟದೆ ವಂಚಿಸಿದವರನ್ನು ವಿಚಾರಣೆಗೊಳಪಡಿಸಲಾಗುತ್ತದೆ. ಸೇವಾ ತೆರಿಗೆಗೆ ಅನ್ವಯವಾಗುವ ಹಣಕಾಸು ಕಾಯ್ದೆ 1994ರಡಿ ಮತ್ತು ಕೇಂದ್ರ  ತೆರಿಗೆ ಕಾಯ್ದೆ 1944ರಡಿ ನೀವು ಖುದ್ದಾಗಿ ಇಲ್ಲವೇ ನಿಮ್ಮ ಏಜೆಂಟರ ಮೂಲಕ ಫೆಬ್ರವರಿ 16ರೊಳಗೆ ವಿಚಾರಣೆಗೆ ಕಚೇರಿಗೆ ಹಾಜರಾಗಬೇಕು. ಈ ಸಂದರ್ಭದಲ್ಲಿ ಅಗತ್ಯಪಟ್ಟ ದಾಖಲೆಗಳನ್ನು ಕೂಡ ಸಲ್ಲಿಸಬೇಕು ಎಂದು ನೊಟೀಸ್ ನಲ್ಲಿ ತಿಳಿಸಲಾಗಿದೆ.

ಒಂದು ವೇಳೆ ಸೂಕ್ತ ಕಾರಣಗಳಿಲ್ಲದೆ ಕಚೇರಿಗೆ ಹಾಜರಾಗಲು ವಿಫಲವಾದಲ್ಲಿ  ಮತ್ತು ಸಂಬಂಧಪಟ್ಟ ಅಗತ್ಯ ದಾಖಲೆಗಳನ್ನು ತೋರಿಸದಿದ್ದಲ್ಲಿ ಐಪಿಸಿ ಸೆಕ್ಷನ್ ಅನ್ವಯ ಶಿಕ್ಷೆಗೊಳಪಡುತ್ತೀರಿ ಎಂದು ಕೂಡ ನೊಟೀಸ್ ನಲ್ಲಿ ವಿವರಿಸಲಾಗಿದೆ.