ನವದೆಹಲಿ: ಫೀಪಾ ಅಂಡರ್ 17 ವಿಶ್ವಕಪ್ ನ್ನು ಪ್ರಚಾರ ಮಾಡಲು ಬಿಜೆಪಿ ಸಂಸದೀಯ ಸಭೆಗೆ ಕ್ರೀಡಾ ಸಚಿವ ವಿಜಯ್ ಗೋಯಲ್ ಫುಟ್ ಬಾಲ್ ಹಿಡಿದುಕೊಂಡು ಬಂದ ಪ್ರಸಂಗ ಇಂದು ನಡೆಯಿತು.

ಮುಂದಿನ ಅಕ್ಟೋಬರ್ 28ರಂದು ಫೀಫಾ ಅಂಡರ್ 17 ವಿಶ್ವಕಪ್ ನ ಕೊನೆಯ ಪಂದ್ಯ ಕೋಲ್ಕತ್ತಾದ ಸಾಲ್ಟ್ ಲೇಕ್ ಸ್ಟೇಡಿಯಂನಲ್ಲಿ ನಡೆಯಲಿದೆ. ಭಾರತದಲ್ಲಿ ಮೊದಲ ಬಾರಿಗೆ ನಡೆಯುತ್ತಿರುವ ಅಂಡರ್ 17 ಫೀಫಾ ವಿಶ್ವಕಪ್ ನ ಸೆಮಿ ಫೈನಲ್ ಪಂದ್ಯಗಳು ನವಿ ಮುಂಬೈ ಹಾಗೂ ಗುವಾಹಟಿಯಲ್ಲಿ ನಡೆಯಲಿದೆ. ಪಂದ್ಯವನ್ನಾಡಲು ಭಾರತದಾದ್ಯಂತ 6 ಸ್ಥಳಗಳನ್ನು ಆಯ್ಕೆ ಮಾಡಿಕೊಳ್ಳಲಾಗಿದ್ದು, ಫೀಫಾ ಮತ್ತು ಸ್ಥಳೀಯ ಆಯೋಜಕ ಸಮಿತಿ ಪಂದ್ಯಗಳ ದಿನಾಂಕಗಳನ್ನು ಘೋಷಿಸಿದೆ.

ಅಕ್ಟೋಬರ್ 6ರಂದು ಮೊದಲ ಡಬಲ್ ಹೆಡರ್ ಪಂದ್ಯ ದೆಹಲಿ ಮತ್ತು ನವಿ ಮುಂಬೈಯಲ್ಲಿ ಆರಂಭವಾಗಿ ಉಳಿದ 4 ಕ್ವಾರ್ಟರ್ ಫೈನಲ್ ಪಂದ್ಯಗಳು ಗೋವಾ, ಗುವಾಹಟಿ, ಕೊಚ್ಚಿ ಮತ್ತು ಕೋಲ್ಕತ್ತಾದಲ್ಲಿ ನಡೆಯಲಿವೆ.

ಪ್ರತಿ ಸ್ಥಳದಲ್ಲಿ 8 ಪಂದ್ಯಗಳು ನಡೆಯಲಿವೆ. ಇದಕ್ಕಾಗಿ ಸಕಲ ಸಿದ್ಧತೆ ಮಾಡಿಕೊಳ್ಳಲಾಗುತ್ತಿದೆ ಎಂದು ಫೀಫಾ ಟೂರ್ನಮೆಂಟ್ ಮುಖ್ಯಸ್ಥ ಜೈಮ್ ಯಾರ್ಸಾ ತಿಳಿಸಿದ್ದಾರೆ.

ಫೀಫಾ ಅಂಡರ್ 17 ವಿಶ್ವಕಪ್ ನ ಡ್ರಾ ಮುಂಬೈಯಲ್ಲಿ ಜುಲೈ 7ರಂದು ನಡೆಯಲಿದೆ.