ಹ್ಯಾಮಿಲ್ಟನ್: ನ್ಯೂಜಿಲೆಂಡ್ ನಲ್ಲಿ ನಡೆದಿರುವ ನಾಲ್ಕು ರಾಷ್ಟ್ರಗಳ ಇನ್ವಿತೇಷನಲ್ ಹಾಕಿ ಪಂದ್ಯಾವಳಿಯ ಎರಡನೇ ಲೀಗ್ ನಲ್ಲಿ ವಿಶ್ವ ನಂ.3 ಬೆಲ್ಜಿಯಂ ವಿರುದ್ಧ ಭಾರತ ಅಭೂತಪೂರ್ವ ಜಯ ದಾಖಲಿಸಿದೆ.

ಪ್ರಬಲ ಎದುರಾಳಿಯಾಗಿದ್ದ ಬೆಲ್ಜಿಯಂ ವಿರುದ್ಧ ಭಾರತ 5-4 ಗೋಲುಗಳ ಅಂತರದಲ್ಲಿ ಜಯ ಸಾಧಿಸಿದೆ.

ಭಾರತದ ಪರವಾಗಿ ರುಪಿಂದರ್ ಪಾಲ್ ಸಿಂಗ್(4', 42'), ದಿಲ್ಪ್ರೀತ್ ಸಿಂಗ್(59'), ಲಲಿತ್ ಉಪಾಧ್ಯಾಯ್(53') ಹಾಗೂ ಹರ್ಮನ್ಪ್ರೀತ್ ಸಿಂಗ್(46') ತಮ್ಮ ಶ್ರೇಷ್ಠ ಪ್ರದರ್ಶನದಲ್ಲಿ ಗೋಲುಗಳನ್ನು ದಾಖಲಿಸಿ ತಂಡದ ಜಯಕ್ಕೆ ಕಾರಣರಾದರು.

ಈ ಹಿಂದೆ ಬೆಲ್ಜಿಯಂ ವಿರುದ್ಧದ ಪಂದ್ಯದಲ್ಲಿ ಸೋಲಿನ ಕಹಿ ಅನುಭವಿಸಿದ್ದ ಭಾರತ ತಂಡ ಈ ಬಾರಿ ಅಮೋಘ ಪ್ರದರ್ಶನ ನೀಡಿದೆ. ಎರಡನೇ ಲೀಗ್ ಹಂತದ ಮೊದಲ ಪಂದ್ಯದಲ್ಲಿ ಭಾರತ ಅತಿಥೇಯ ನ್ಯೂಜಿಲೆಂಡ್ ವಿರುದ್ಧ ಜಯ ಸಾಧಿಸಿದ್ದು ಇದೀಗ ಬೆಲ್ಜಿಯಂ ವಿರುದ್ಧವೂ ಜಯಿಸುವ ಮೂಲಕ ಯಶಸ್ಸಿನ ಹಾದಿಗೆ ಮರಳಿದೆ.