ಬ್ಯೂರಿಸ್ ಐರಿಸ್: ಅರ್ಜೆಂಟೈನಾದ ಬ್ಯೂರಿಸ್ ಐರಿಸ್ ನಲ್ಲಿ ನಡೆಯುತ್ತಿರುವ ಮೂರನೇ ಆವೃತ್ತಿಯ ಯೂತ್ ಒಲಂಪಿಕ್ಸ್ ಕ್ರೀಡಾಕೂಟದ ಅಥ್ಲೆಟಿಕ್ಸ್ ವಿಭಾಗದಲ್ಲಿ ಭಾರತದ ಸೂರಜ್ ಪನ್ವಾರ್ ಬೆಳ್ಳಿ ಪದಕ ಗಳಿಸಿದ್ದಾರೆ. ಇದು ಭಾರತದ ಪಾಲಿಗೆ ಕ್ರೀಡಾಕೂಟದಲ್ಲಿ ಅಥ್ಲೆಟಿಕ್ಸ್ ವಿಭಾಗದ ಮೊದಲ ಪದಕವಾಗಿದೆ.
5,000 ಮೀ ರೇಸ್ ವಾಕ್ ನಲ್ಲಿ ಸೂರಜ್ ಪದಕದ ಸಾಧನೆ ಮಾಡಿದ್ದು ಎರಡು ಹಂತಗಳಲ್ಲಿ 20.35.87 ಮತ್ತು 20.23.30 ಸಮಯದಲ್ಲಿ ಅವರು ಗುರಿ ಮುಟ್ಟಿದ್ದಾರೆ.
ಎರಡೂ ಹಂತಗಳಲ್ಲಿ ದ್ವಿತೀಯ ಸ್ಥಾನ ಪಡೆಇದ್ದ ಸೂರಜ್ ಇದೇ ವಿಭಾಗದಲ್ಲಿ ಚಿನ್ನದ ಪದಕ ಗಳಿಸಿದ ಈಕ್ವೆಡಾರ್ ನ ಸ್ಪರ್ಧಿ ಅಸ್ಕರ್ ಪಾಟಿನ್ ಅವರಿಗಿಂತ ಏಳು ನಿಮಿಷ ಕಾಲ ಹಿಂದುಳಿದಿದ್ದರು.ಪೋರ್ಟೋರಿಕೋ ಸ್ಪರ್ಧಿ ಮೂರನೇ ಸ್ಥಾನ ಪಡೆದು ಕಂಚಿನ ಪದಕಕ್ಕೆ ಕೊರಳೊಡ್ಡಿದ್ದಾರೆ.
ಐಎಎಎಫ್ ಗೆ ನೀಡಿದ ಸಂದರ್ಶನದಲ್ಲಿ ಸೂರಜ್ ಒಲಿಂಪಿಕ್ಸ್, ಏಷ್ಯನ್ ಗೇಮ್ಸ್, ಕಾಮನ್ವೆಲ್ತ್ ಕ್ರೀಡಾಕೂಟಕ್ಕಾಗಿ ತರಬೇತಿ ಹೊಂದಿ ಪದಕ ಗಳಿಸುವುದು ನನ್ನ ಮುಂದಿನ ಗುರಿ ಎಂದಿದ್ದಾರೆ.