ಚಾಂಗ್‍ವೊನ್(ದಕ್ಷಿಣ ಕೊರೊಯಾ): ದಕ್ಷಿಣ ಕೊರಿಯಾದ ಚಾಂಗ್‍ವೊನ್ ನಲ್ಲಿ ಸಾಗುತ್ತಿರುವ ಐಎಸ್ಎಸ್ಎಫ್ ವಿಶ್ವ ಚಾಂಪಿಯನ್ ಶಿಪ್ ಶೂಟಿಂಗ್ ಪಂದ್ಯಾವಳಿಯಲ್ಲಿ ಭಾರತೀಯರ ಚಿನ್ನದ ಬೇಟೆ ಮುಂದುವರಿದಿದೆ. 

ಏಷ್ಯನ್ ಗೇಮ್ಸ್ ಚಿನ್ನದ ಶೂಟರ್ ಸೌರಭ್  10 ಮೀ. ಏರ್ ಪಿಸ್ತೂಲ್ ವಿಭಾಗದಲ್ಲಿ ಗುರುವಾರ ಚಿನ್ನಕ್ಕೆ ಗುರಿಯಿಟ್ಟಿದ್ದರೆ ಶುಕ್ರವಾರ ಭಾರತಕ್ಕೆ ಮತ್ತೆರಡು ಚಿನ್ನದ ಪದಕ ಲಭಿಸಿದೆ.

ಪುರುಷರ 10 ಮೀ. ಏರ್‌ ರೈಫ‌ಲ್‌ ನಲ್ಲಿ ಭಾರತದ ಜೂನಿಯರ್‌ ಶೂಟರ್ ಹೃದಯ್‌ ಹಜಾರಿಕಾ ಚಿನ್ನದ ಪದಕ ಗಳಿಸಿಕೊಂಡರೆ ಭಾರತೀಯ ಮಹಿಳಾ ಪಡೆ ನೂತನ ದಾಖಲೆ ನಿರ್ಮಿಸಿ ಬಂಗಾರದ ಪದಕ ತಮ್ಮದಾಗಿಸಿಕೊಂಡಿದೆ.

ಹೃದಯ್‌  ಅಂತಿಮ ಸುತ್ತಿನಲ್ಲಿ 627.3 ಅಂಕ ಪಡೆದು ಇರಾನ್ ನ ತಮ್ಮ ಎದುರಾಳಿಯ ವಿರುದ್ಧ ಜಯ ಸಾಧಿಸಿದ್ದಾರೆ.

ಇ. ವಲರಿವನ್‌, ಶ್ರೇಯಾ ಅಗರ್‌ವಾಲ್‌, ಮಾನಿನಿ ಕೌಶಿಕ್‌ ಅವರನ್ನೊಳಗೊಂಡ ಬಾರತೀಯ ಮಹಿಳಾ ಶೂಟರ್ ತಂಡವು 10 ಮೀ. ಏರ್‌ ರೈಫ‌ಲ್‌ ಸ್ಪರ್ಧೆಯಲ್ಲಿ ಒಟ್ಟು 1880.7 ಅಂಕಗಳಿಸಿ ವಿಶ್ವ ದಾಖಲೆ ನಿರ್ಮಾಣ ಮಾಡಿದ್ದಲ್ಲದೆ ಬಂಗಾರದ ಪದಕಕ್ಕೆ ಕೊರಳೊಡ್ಡಿತು.