ಹಾಂಕಾಂಗ್: ಭಾರತದಿಂದ ಪ್ರಶಸ್ತಿ ಗೆಲ್ಲುವ ಸಂಭಾವ್ಯ ಆಟಗಾರ್ತಿಯರಲ್ಲಿ ಒಬ್ಬರಾಗಿದ್ದ ಸೈನಾ ನೆಹ್ವಾಲ್ ಮತ್ತು  ಸಮೀರ್ ವರ್ಮಾ ಅವರು ಇಲ್ಲಿ ನಡೆಯುತ್ತಿರುವ ಹಾಂಕಾಂಗ್ ಓಪನ್ ಬ್ಯಾಡ್ಮಿಂಟನ್ ಟೂರ್ನಿಯ ಮೊದಲನೇ ಸುತ್ತಿನಲ್ಲೇ ಸೋತು ನಿರಾಸೆ ಮೂಡಿಸಿದ್ದಾರೆ.

ಬುಧವಾರ ನಡೆದ ಮಹಿಳೆಯರ ಸಿಂಗಲ್ಸ್ ಮೊದಲ ಸುತ್ತಿನ ಪಂದ್ಯದಲ್ಲಿ ಕಠಿಣ ಹೋರಾಟದ ನಡೆವೆಯೂ ಸೈನಾ ನೆಹ್ವಾಲ್ ಅವರು 13-21, 20-22 ಅಂತರದ ನೇರ ಸೆಟ್‍ಗಳಿಂದ ಚೀನಾದ ಚೈ ಯಾನ್ ಯಾನ್ ವಿರುದ್ಧ ಸೋಲು ಅನುಭವಿಸಿದರು.

ಪಂದ್ಯದ ಆರಂಭದಿಂದಲೂ ಆಕ್ರಮಣಕಾರಿ ಪ್ರದರ್ಶನ ತೋರಿದ ಚೀನಾದ ಆಟಗಾರ್ತಿ, ಭಾರತದ ಆಟಗಾರ್ತಿಗೆ ಪುಟಿದೇಳಲು ಅವಕಾಶ ನೀಡಲೇ ಇಲ್ಲ. ಮೊದಲನೇ ಸೆಟ್ ಸೋತ ಬಳಿಕ ಸೈನಾ, ಎರಡನೇ ಸೆಟ್‍ನಲ್ಲಿ ಚೈ ಯಾನ್ ಯಾನ್‍ಗೆ ತಿರುಗೇಟು ನೀಡುವತ್ತ ದಿಟ್ಟ ಹೆಜ್ಜೆ ಇಟ್ಟಿದ್ದರು. ಆದರೆ, ಅಂತಿಮವಾಗಿ ಕೇವಲ ಎರಡು ಅಂಕಗಳ ಅಂತರದಲ್ಲಿ ನೆಹ್ವಾಲ್ ಎರಡನೇ ಸೆಟ್ ಬಿಟ್ಟು ಕೊಟ್ಟರು.

ಇನ್ನೊಂದೆಡೆ ಪುರುಷರ ಸಿಂಗಲ್ಸ್ ಮೊದಲನೇ ಸುತ್ತಿನ ಪಂದ್ಯದಲ್ಲಿ ಕಠಿಣ ಹೋರಾಟದ ನಡುವೆಯೂ ಸಮೀರ್ ವರ್ಮಾ ಅವರು 11-21, 21-13, 8-21 ಅಂತರದಲ್ಲಿ ತೈವಾನ್‍ನ ವಾಂಗ್ ಟಿಜು ವೀ ವಿರುದ್ಧ ಸೋತು ಆಘಾತ ಅನುಭವಿಸಿದರು.

ಮೊದಲನೇ ಸೆಟ್‍ನಲ್ಲಿ ಸೋಲು ಅನುಭವಿಸಿದ್ದ ಸಮೀತ್ ವರ್ಮಾ, ಎರಡನೇ ಸೆಟ್‍ನಲ್ಲಿ ಪುಟಿದೇಳುವ ಮೂಲಕ ತೈವಾನ್ ಆಟಗಾರನಿಗೆ ತಿರುಗೇಟು ನೀಡಿದರು. ನಂತರ, ಮೂರನೇ ಹಾಗೂ ನಿರ್ಣಾಯಕ ಸೆಟ್‍ನಲ್ಲಿ ಎಚ್ಚೆತ್ತುಕೊಂಡ ವಾಂಗ್ ಟಿಜು, ಭಾರತದ ಆಟಗಾರನನ್ನು ಕೇವಲ ಎಂಟು ಅಂಕಗಳಿಗೆ ಕಟ್ಟಿ ಹಾಕಿ ಪಂದ್ಯ ತನ್ನದಾಗಿಸಿಕೊಂಡರು.