ಪಂಚಕುಲ: ಕೊನೆಯ ಕ್ಷಣದವರೆಗೂ ರೋಚಕತೆ ಹುಟ್ಟಿಸಿದ್ದ ಏಳನೇ ಅವೃತ್ತಿ ಪ್ರೊ ಕಬಡ್ಡಿ ಲೀಗ್ ನ 114ನೇ ಪಂದ್ಯದಲ್ಲಿ ಹರಿಯಾಣ ಸ್ಟೀಲರ್ಸ್ 38-37 ರಿಂದ ಗುಜರಾತ್ ಫಾರ್ಚುನ್ ಜೇಂಟ್ಸ್ ತಂಡವನ್ನು ಮಣಿಸಿ, ಮುಂದಿನ ಹಂತಕ್ಕೆ ಅರ್ಹತೆ ಪಡೆದಿದೆ. ಭಾನುವಾರ ನಡೆದ ಎರಡನೇ ಪಂದ್ಯದಲ್ಲಿ ಭರ್ಜರಿ ಪ್ರದರ್ಶನ ನೀಡಿದ ಹರಿಯಾಣ 19 ಪಂದ್ಯಗಳಿಂದ 65 ಅಂಕ ಕಲೆ ಹಾಕಿದ್ದು, ಮುಂದಿನ ಸುತ್ತಿಗೆ ಪ್ರವೇಶ ಪಡೆದುಕೊಂಡಿದೆ. ಮೊದಲಾವಧಿಯಲ್ಲಿ 19-14 ರಿಂದ ಮುನ್ನಡೆ ಸಾಧಿಸಿತ್ತು. ಎರಡನೇ ಅವಧಿಯಲ್ಲಿ ರೋಚಕತೆ ಹುಟ್ಟಿಸಿದ್ದ ಪಂದ್ಯದಲ್ಲಿ ಉಭಯ ತಂಡಗಳು ಅಂಕ ಬೇಟೆಗೆ ಇಳಿದವು. 

ದಾಳಿಯಲ್ಲಿ ಹರಿಯಾಣ 23 ಅಂಕಗಳನ್ನು ಕಲೆ ಹಾಕಿತು. ಗುಜರಾತ್ ಟ್ಯಾಕಲ್ ನಲ್ಲಿ 13 ಅಂಕಗಳನ್ನು ಕಲೆ ಹಾಕಿತು. ಇನ್ನು ಉಭಯ ತಂಡಗಳು ತಲಾ ಒಂದೊಂದು ಬಾರಿ ಆಲೌಟ್ ಆದವು. ಇನ್ನು ಹರಿಯಾಣ ಪರ ವಿಕಾಸ್ ಕಂಡೋಲ್ 20 ಬಾರಿ ದಾಳಿ ನಡೆಸಿ 10 ಅಂಕ ಕಲೆ ಹಾಕಿದರು. ಪ್ರಶಾಂತ್ ಕುಮಾರ್ ರೈ 9 ಅಂಕ ಸಂಪಾದಿಸಿದರು. ಜೇಂಟ್ಸ್ ಪರ ರೋಹಿತ್ ಗುಲಿಯಾ 11, ಸೋನು 8 ಅಂಕ ಬುಟ್ಟಿಗೆ ಹಾಕಿಕೊಂಡರು.