ಚಂಡೀಗಢ: ಭಾರತೀಯ ಟ್ರ್ಯಾಕ್ ಅಂಡ್‌ ಫೀಲ್ಡ್ ಶತಾಯುಷಿ ಕ್ರೀಡಾಪಟು, ಚಂಡೀಗಡದ ಅದ್ಭುತ ಓಟಗಾರ್ತಿ ಎಂದೇ ಹೆಸರಾಗಿದ್ದ ಮನ್ ಕೌರ್ ಇನ್ನಿಲ್ಲ.
ಪಿತ್ತಕೋಶ ಕ್ಯಾನ್ಸರ್ ನಿಂದ ಬಳಲುತ್ತಿದ್ದ 105 ವರ್ಷದ ಮನ್ ಕೌರ್ ಅವರು ಮೊಹಾಲಿಯ ಶುದ್ಧಿ ಆಯುರ್ವೇದ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವಾಗ ಶನಿವಾರ ಕೊನೆಯುಸಿರೆಳೆದಿದ್ದಾರೆ. ಈ ವಿಷಯವನ್ನು ಪುತ್ರ ಗುರುದೇವ್ ಸಿಂಗ್ ದೃಢಪಡಿಸಿದ್ದಾರೆ. ವಯಸ್ಸು ಕೇವಲ ಒಂದು ಸಂಖ್ಯೆ ಮಾತ್ರ ಎಂದು ಸಾಭೀತುಪಡಿಸಿದ್ದ ಅದ್ಭುತ ಆಟಗಾರ್ತಿಯ ಸಾವಿಗೆ ಹಲವು ಆಟಗಾರರು ಸಂತಾಪ ಸೂಚಿಸಿದ್ದಾರೆ.
2017ರಲ್ಲಿ ಆಕ್ಲೆಂಡ್ ನಲ್ಲಿ ನಡೆದ ವಿಶ್ವ ಮಾಸ್ಟರ್ಸ್ ಗೇಮ್ಸ್ ನಲ್ಲಿ 100 ಮೀಟರ್ ಗೆಲುವು ಸಾಧಿಸಿದ್ದ ಶತಾಯುಷಿ ಓಟಗಾರ್ತಿ ಮನ್ ಕೌರ್ 1916, ಮಾರ್ಚ್ 1, ರಂದು ಜನಿಸಿದ್ದರು.
ವಾಸ್ತವವಾಗಿ ಮನ್ ಕೌರ್ ಅವರು 93 ವರ್ಷ ವಯಸ್ಸಿನವರೆಗೂ ಅಥ್ಲೆಟಿಕ್ಸ್ ಆರಂಭಿಸಲಿಲ್ಲ. 2016 ರಲ್ಲಿ ಅಮೆರಿಕನ್ ಮಾಸ್ಟರ್ಸ್ ಗೇಮ್ಸ್ ನಲ್ಲಿ ಅತ್ಯಂತ ವೇಗವಾಗಿ ಓಡುವ ಶತಾಯುಷಿಯಾಗಿ ಹೊರಹೊಮ್ಮಿದ್ದರು. 100 ವರ್ಷ ಮೇಲ್ಪಟ್ಟವರ ವಿಭಾಗದಲ್ಲಿ ಅವರು ವಿಶ್ವ ದಾಖಲೆಗಳನ್ನು ಹೊಂದಿದ್ದರು.
ವಿಶ್ವ ಮಾಸ್ಟರ್ಸ್ ಅಥ್ಲೆಟಿಕ್ಸ್ ಚಾಂಪಿಯನ್ ಶಿಪ್ ನಲ್ಲಿ ಹಲವು ಚಿನ್ನದ ಪದಕಗಳನ್ನು ಗೆದ್ದಿದ್ದಾರೆ. 2019 ರಲ್ಲಿ ಪೋಲೆಂಡ್ ನಲ್ಲಿ ಷಾಟ್ ಪುಟ್ 60 ಮೀ ಸ್ಪ್ರಿಂಟ್, 200 ಮೀ, ಜಾವೆಲಿನ್ ಥ್ರೋ ನಾಲ್ಕು ಸ್ಪರ್ಧೆಗಳಲ್ಲಿ ಕೌರ್ ಗೆಲುವು ಸಾಧಿಸಿದ್ದು ವಿಶೇಷ.
ಕೌರ್ ಅವರ ಪುತ್ರ ಗುರುದೇವ್ ಸಿಂಗ್ ಖುದ್ದು ತಾಯಿಗೆ ತರಬೇತಿಗಾರರಾಗಿದ್ದರು. ಮನ್ ಕೌರ್ ಗೆ ಇಬ್ಬರು ಪತ್ರರು, ಓರ್ವ ಪುತ್ರಿ. 104 ನೇ ವಯಸ್ಸಿನಲ್ಲಿ ಕೇಂದ್ರ ಸರ್ಕಾರ 2020 ಮಾರ್ಚ್ 8, ಅಂತಾರಾಷ್ಟ್ರೀಯ ಮಹಿಳಾ ದಿನಾಚರಣೆಯಂದು ನಾರಿ ಶಕ್ತಿ ಪ್ರಶಸ್ತಿ ನೀಡಿ ಗೌರವಿಸಿತ್ತು.