ಟೋಕಿಯೊ: ಒಲಂಪಿಕ್ಸ್ ಚಾಂಪಿಯನ್ ಪಟ್ಟವನ್ನು ಅಲಂಕರಿಸುವ ಕನಸು ಕಂಡಿದ್ದ ಭಾರತದ ಸ್ಟಾರ್ ಪಿ.ವಿ ಸಿಂಧು ಅವರ ಕನಸು ನುಚ್ಚುನೂರಾಗಿದೆ. 

ಶನಿವಾರ ನಡೆದ ಮಹಿಳೆಯರ ಸಿಂಗಲ್ಸ್ ಸೆಮಿಫೈನಲ್ಸ್ ಪಂದ್ಯದಲ್ಲಿ ಸಿಂಧು ಸೋತು, ಫೈನಲ್ ಪ್ರವೇಶಿಸುವಲ್ಲಿ ವಿಫಲರಾಗಿದ್ದಾರೆ. ಇನ್ನು ಸಿಂಧು ಕಂಚಿನ ಪದಕಕ್ಕಾಗಿ ಕಾದಾಟ ನಡೆಸಬೇಕಿದೆ. 

ಎರಡು ನೇರ ಸೆಟ್ ಗಳಲ್ಲಿ ಪಂದ್ಯವನ್ನು ಕೈ ಚೆಲ್ಲಿದ ಸಿಂಧು, ಬಂಗಾರ ಗೆಲ್ಲುವ ಅವಕಾಶವನ್ನು ಕಳೆದುಕೊಂಡರು. 40 ನಿಮಿಷ ನಡೆದ ಆಟದಲ್ಲಿ ಸಿಂಧು 18-21, 12-21ರಿಂದ ಟೂರ್ನಿಯಲ್ಲಿ ಎರಡನೇ ಶ್ರೇಯಾಂಕ ಹೊಂದಿದ್ದ ತೈ ಜು ಯಿಂಗ್ ವಿರುದ್ಧ ಆಘಾತ ಅನುಭವಿಸಿದರು. ತಮ್ಮ ಮೂರನೇ ಒಲಿಂಪಿಕ್ಸ್ ಆಡುತ್ತಿರುವ ತೈ ಜು ಯಿಂಗ್ ಇದೇ ಮೊದಲ ಬಾರಿಗೆ ಒಲಿಂಪಿಕ್ಸ್ ಪದಕ ಪಡೆಯಲಿದ್ದಾರೆ.