ಬಯಲ ಹಾದಿಯ ಹಿಡಿದು ಬದುವಿನಲಿ ಪಯಣ
ಎಡ ಬಲದುದ್ದಕೂ ಶಬ್ದಗಳ ಸಾಲು ಸಾಲು
ಒಂದೊಂದು ಶಬ್ದವೂ ನಿಶ್ಶಬ್ದದಲಿ ಸಾಗಿ
ಬಿಳಿಯ ಹಾಳೆಯ ತುಂಬಾ ಚೆಲ್ಲಾಪಿಲ್ಲಿ

ಕ್ಷಣ ಬೆದರಿದ ಕವಿ
ಸಾಲು ಸಾಲಿಗಿಡಲಾರ ಸಾಲು ಜೋಡಿಸಲಾರ
ತಾನೇ ಸೃಷ್ಟಿಸಿದ ಶಬ್ದಗಳ ಬಿಸುಡಲಾರ
ಸಿಕ್ಕೀತೇ ಒಂದೊಂದು ಶಬ್ದಕ್ಕು ಒಂದಿಷ್ಟು ಅರ್ಥ?

ಬರೆಯಬಹುದಿತ್ತು ಒಂದು ಪುಟ್ಟ ಕವಿತೆ
ಭಾವ ಭಕುತಿ ಸ್ವಲ್ಪವೂ ವಿಜೃಂಭಿಸದ ಹಾಗೆ
ಅಥವಾ
ಶಬ್ದಗಳ ಹಂಗೇ ಇರದ ಒಂದು ಚೆಂಗುಲಾಬಿಯ ಚಿತ್ರ.
ಬೇಡ.
ಅದರದೊಂದು ಪಕಳೆಯಾದರೂ...?
ತುಂಬಬಹುದಿತ್ತು ಒಂದಿಷ್ಟು ಬಣ್ಣ ರಾಡಿಯಾಗದಂತೆ
ಅಥವಾ
ಸುಮ್ಮನಿರಬಹುದಿತ್ತೆ?
-ಗೀತಾ ಡಿ.ಸಿ.