ಇವರೆಲ್ಲ ಸಾವಿನ ಆಹ್ವಾನಕ್ಕೆ ಕಾದು ಕುಳಿತಿದ್ದಾರೆ. ಆ ಕಾಯುವಿಕೆಯನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿದದ್ದು ಆಂಗ್ಲ ಛಾಯಾಗ್ರಾಹಕ 'ಹ್ಯುಗೋ ಗೈ'

ಅದು ನೂರಾರು ನೆರಿಗೆಗಳ ಸೂರು. ಆ ಬೊಚ್ಚು ಬಾಯಿಗಳನ್ನು ಮಾತನಾಡಿಸಿದರೆ ಅಲ್ಲಿ ಹಲವು ಕಥೆಗಳು ಬಿಚ್ಚಿಕೊಳ್ಳುತ್ತವೆ. ಊರೂರು ಬಿಟ್ಟು ಕಾಶಿಯ ಟ್ರೈನೇರಿದ ಕ್ಷಣ, ಜನ್ಮಜನ್ಮಕೂ ನೆರಳಾಗಿರುತ್ತೇನೆಂದ ಪತಿ ನರಳುತ್ತಾ ಸತ್ತಾಗ ಉಕ್ಕಿದ ಕಣ್ಣೀರು, ತಾಳಿಯಿಲ್ಲದ ಖಾಲಿ ಕುತ್ತಿಗೆಯನ್ನು ಹೆತ್ತಮಗ ಕೈಹಾಕಿ ಹೊರದಬ್ಬಿದ ದುಃಖದ ದಿನ... ಎಲ್ಲವೂ ಅಲ್ಲಿ ಮಾತಿಗೆ ವಸ್ತು.

ಅವರೆಲ್ಲ ಇಲ್ಲೇಕೆ ಬಂದಿದ್ದಾರೆಂದರೆ, ವಿಶ್ವನಾಥನೆದುರು ಹೃದಯ ಹಗುರ ಮಾಡಿಕೊಳ್ಳಲಷ್ಟೇ. ಬದುಕುಳಿಯುವ ನಾಲ್ಕು ನಿಮಿಷಗಳಲ್ಲಾದರೂ ಶಿವನ ಧ್ಯಾನ ಮಾಡಿ, ಶವಸಿಂಹಾಸನ ಏರುವ ಸಣ್ಣ ಆಸೆಯಷ್ಟೇ. ಕಾಶಿಯ 'ಡೆತ್ ಹಾಸ್ಟೆಲ್‌'ನಲ್ಲಿ ಇಂಥ ಸಾವಿರ ವೃದ್ಧೆ ವಿಧವೆಯರನ್ನು ಕಾಣಬಹುದು. ಅವರೆಲ್ಲ ಹಳೇ ದುಃಖಗಳನ್ನು ಮರೆಯಲೆತ್ನಿಸಲು ಸಣ್ಣಪುಟ್ಟ ಕೆಲಸಗಳಲ್ಲಿ ತೊಡಗಿದ್ದಾರೆ. ಸಾವಿನ ಆಹ್ವಾನಕ್ಕೆ ಕಾದು ಕುಳಿತಿದ್ದಾರೆ. ಆ ಕಾಯುವಿಕೆಯನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿದದ್ದು ಆಂಗ್ಲ ಛಾಯಾಗ್ರಾಹಕ 'ಹ್ಯುಗೋ ಗೈ'.