ನವದೆಹಲಿ: ಉತ್ತಮ ಕ್ರೀಡಾಪಟುವಿನಂತೆ ನರೇಂದ್ರ ಮೋದಿಯವರಿಗೆ ದೃಢ ಮನಸ್ಸು ಇದೆ. ಅದೇ ಅವರ ಶಕ್ತಿ, ಅದರಿಂದಲೇ ಅವರಿಷ್ಟು ಉನ್ನತ ಮಟ್ಟಕ್ಕೆ ಏರಿದ್ದಾರೆ ಎಂದು ವಿತ್ತ ಸಚಿವ  ಅರುಣ್ ಜೇಟ್ಲಿ ಹೇಳಿದ್ದಾರೆ.

ಕಳೆದ 15 ವರ್ಷಗಳಿಂದ ನಾನು ಮೋದಿ ಅವರ ಒಡನಾಡಿಯಾಗಿದ್ದೇನೆ. ಅವರು ತುಂಬಾ ಶಿಸ್ತಿನ ಹಾಗೂ ಕಟ್ಟು ನಿಟ್ಟಿನ ವ್ಯಕ್ತಿ ಎಂದು ಭಾನುವಾರ ಮಾಧ್ಯಮದವರೊಂದಿಗೆ ನಡೆದ ಸಂವಾದದಲ್ಲಿ ಜೇಟ್ಲಿ ಹೇಳಿದ್ದಾರೆ.

ಅವರ ಅಭಿವೃದ್ಧಿ ಮಂತ್ರಗಳು ಹಾಗೂ ಯೋಜನೆಗಳು ಅವರನ್ನು ಉತ್ತಮ ನಾಯಕನನ್ನಾಗಿ ಮಾಡಿದೆ. ಸರ್ಕಾರ ಮುನ್ನಡೆಸುವ ಕೆಲಸವೇ ಆಗಿರಲಿ, ಅವರು ತುಂಬಾ ಶ್ರದ್ಧೆ ಹಾಗೂ ಶ್ರವದಿಂದ ಕೆಲಸ ನಿರ್ವಹಿಸುತ್ತಾರೆ. ಇದರಿಂದಾಗಿಯೇ ಅವರಿಗೆ ಸರ್ಕಾರದಲ್ಲಿ ಯಾವ್ಯಾವ ವಿಭಾಗ ಯಾವ ಯಾವ ಕೆಲಸಗಳನ್ನು ನಿರ್ವಹಿಸುತ್ತಿದೆ ಎಂಬುದರ ಬಗ್ಗೆ ಸರಿಯಾಗಿ ಗೊತ್ತಿದೆ.

ಅವರೊಬ್ಬ ಉತ್ತಮ ಕಲಿಕೆಗಾರ. ಅವರು ಪ್ರಧಾನಿ ಹುದ್ದೆಗೇರಿದ್ದೇ ತಡ ಅವರು ಅಂತಾರಾಷ್ಟ್ರೀಯ ಮಟ್ಟದಲ್ಲೂ ಉತ್ತಮ ನಾಯಕರೆನಿಸಿಕೊಂಡರು. ಈ ಹಿಂದೆ ಯಾವುದೇ ರಾಜಕಾರಣಿ ಇಷ್ಟರ ಮಟ್ಟಿಗೆ ಬೆಳವಣಿಗೆ ಕಂಡಿರುವ ಬಗ್ಗೆ ನನಗೆ ಗೊತ್ತಿಲ್ಲ. ಅವರ ಸಾಮರ್ಥ್ಯ  ಏನೆಂದು ಗೊತ್ತಾಗಬೇಕಾದರೆ ಗುಜರಾತ್‌ಗೆ ಹೋಗಿ ನೋಡಬೇಕು ಎಂದು ಜೇಟ್ಲಿ ಮೋದಿಯವರನ್ನು ಶ್ಲಾಘಿಸಿದ್ದಾರೆ.