ನವದೆಹಲಿ: ಆಮ್ ಆದ್ಮಿ ಪಕ್ಷದ ಸಂಸ್ಥಾಪಕ ಸದಸ್ಯರಾದ ಪ್ರಶಾಂತ್ ಭೂಷಣ್ ಮತ್ತು ಯೋಗೇಂದ್ರ ಯಾದವ್ ಅವರನ್ನು ಒಳಗೊಂಡಂತೆ ನಾಲ್ಕು ಜನರನ್ನು ಉಚ್ಛಾಟಿಸಿದ ಒಂದು ದಿನದ ನಂತರ, ತಮಗಿನ್ನೂ ಉಚ್ಛಾಟನಾ ಪತ್ರ ಬಂದಿಲ್ಲ ಎಂದು ಮಂಗಳವಾರ ಈ ನಾಯಕರು ಹೇಳಿದ್ದಾರೆ.
ಅಜಿತ್ ಝಾ ಮತ್ತು ಆನಂದ್ ಕುಮಾರ್ ಅವರೂ ಒಳಗೊಂಡಂತೆ ನಾವು ನಾಲ್ಕೂ ಜನ ಮೊದಲೇ ಪಕ್ಷದಿಂದ ಹೊರಬರಲು ನಿರ್ಧರಿಸಿದ್ದೆವು ಎಂದು ಈ ನಾಯಕರು ತಿಳಿಸಿದ್ದಾರೆ.
"ಪಕ್ಷದಿಂದ ಉಚ್ಛಾಟನಾ ಪತ್ರ ನಮಗಿನ್ನೂ ಬಂದಿಲ್ಲ. ಆದರೆ ಅದಕ್ಕೂ ಮುಂಚೆ ಅಂದರೆ ನೆನ್ನೆ (ಸೋಮವಾರ) ಸಂಜೆ, ನಾವು ನಾಲ್ಕೂ ಜನ ಆಮ್ ಆದ್ಮಿ ಪಕ್ಷದಿಂದ ಹೊರಬರಲು ನಿರ್ಧರಿಸಿದ್ದೆವು" ಎಂದು ಯೋಗೇಂದ್ರ ಯಾದವ್ ರಾಜಧಾನಿಯಲ್ಲಿ ವರದಿಗಾರರಿಗೆ ತಿಳಿಸಿದ್ದಾರೆ.
ಈ ನಾಯಕರನ್ನು ಪಕ್ಷದಿಂದ ಉಚ್ಛಾಟಿಸುವ ನಿರ್ಧಾರ ಆಪ್ ಪಕ್ಷ ಸೋಮವಾರ ತಡರಾತ್ರಿ ಹೊರಡಿಸಿತ್ತು. ಶೋಕಾಸ್ ನೋಟಿಸ್ ಗೆ ಭೂಷಣ್ ಮತ್ತು ಯಾದವ್ ಪ್ರತ್ಯೇಕವಾಗಿ ನೀಡಿದ್ದ ಉತ್ತರವನ್ನು ಪರಿಗಣಿಸಿ ಪಕ್ಷ ಈ ನಿರ್ಧಾರ ಕೈಗೊಂಡಿತ್ತು.
ಯಾದವ್, ಭೂಷಣ್, ಕುಮಾರ್ ಮತ್ತು ಝಾ ವಿರುದ್ಧದ ದೂರುಗಳನ್ನು ವಿಚಾರಣೆ ನಡೆಸಿ ನಿರ್ಧಾರ ಕೈಗೊಳ್ಳಲು ರಾಷ್ಟ್ರೀಯ ಶಿಸ್ತು ಸಮಿತಿ ಏಪ್ರಿಲ್ ೨೦ರಂದು ಸಭೆ ಸೇರಿತ್ತು.