ಬೆಂಗಳೂರು: ಭೂಕಂಪದಿಂದ ನೇಪಾಳದಲ್ಲಿ ಸಂತ್ರಸ್ತರಾಗಿ ಗಾಯಗಳಾಗಿರುವವರಿಗೆ ಚಿಕಿತ್ಸೆ ನೀಡಲು ಬಿಜೆಪಿ ಡಾಕ್ಟರ್ಸ್ ಸೆಲ್ ನೇತೃತ್ವದಲ್ಲಿ ಸೂಪರ್ ಸ್ಪೆಷಾಲಿಟಿ ವೈದ್ಯರ ತಂಡ ನೇಪಾಳದತ್ತ ಹೊರಟಿದೆ.

ಈ ಕುರಿತು ಮಾಹಿತಿ ನೀಡಿದ ಬಿಜೆಪಿ ಡಾಕ್ಟರ್ಸ್ ಸೆಲ್ ಸಂಚಾಲಕ ಡಾ.ಮಂಜುನಾಥ್, ಭೂಕಂಪದಿಂದಾಗಿ ಸುಮಾರು 10 ಸಾವಿರ ಮಂದಿ ಮೃತಪಟ್ಟಿದ್ದಾರೆ ಎಂಬ ಪ್ರಾಥಮಿಕ ಮಾಹಿತಿ ಇದೆ. ಅದೇ ರೀತಿಯಾಗಿ 45 ಸಾವಿರಕ್ಕೂ ಅಧಿಕ ಮಂದಿ ಗಾಯಗೊಂಡಿದ್ದಾರೆ. ಈ ಸಂದರ್ಭದಲ್ಲಿ ಗಾಯಾಳುಗಳಿಗೆ ಚಿಕಿತ್ಸೆ ನೀಡುವ ಉದ್ದೇಶದಿಂದ ತಜ್ಞ ವೈದ್ಯರ ತಂಡ ಅಲ್ಲಿಗೆ ತೆರಳುತ್ತಿದೆ ಎಂದರು.

ಕಠ್ಮಂಡುವಿನ ಚಿರಾಯು ಆಸ್ಪತ್ರೆ ಮಂಗಳವಾರ ತಜ್ಞ ವೈದ್ಯರ ಅವಶ್ಯಕತೆಯನ್ನು ಈ ಮೇಲೆ ಮೂಲಕ ಪ್ರಸ್ತಾಪಿಸಿತು. ತಕ್ಷಣವೇ ಬಿಜೆಪಿ ಡಾಕ್ಟರ್ ಸೆರ್ ವಾಟ್ಸಪ್ ಮೂಲಕ ವೈದ್ಯರಿಗೆ ಸಂದೇಶ ರವಾನಿಸಿತು. 1-2 ಗಂಟೆಯಲ್ಲಿ 20ಕ್ಕೂ ಹೆಚ್ಚು ತಜ್ಞ ವೈದ್ಯರು ತಾವು ನೇಪಾಳಕ್ಕೆ ಹೊರಡುವುದಾಗಿ ಸಿದ್ಧರಾದರು.

ಸದ್ಯಕ್ಕೆ ನೇಪಾಳದಲ್ಲಿ ತಜ್ಞ ವೈದ್ಯರ ಅವಶ್ಯಕತೆ ಇದೆ. ಹೀಗಾಗಿ ಮೊದಲ ಹಂತದಲ್ಲಿ 20 ಸೂಪರ್ ಸ್ಪೆಷಾಲಿಟಿ ವೈದ್ಯರ ತಂಡ ಕಠ್ಮಂಡುಗೆ ತೆರಳುತ್ತಿದೆ ಎಂದು ಅವರು ತಿಳಿಸಿದರು.