ಬರ್ಲಿನ್: ಶಿಲಾಯುಗದಲ್ಲಿ ನಡೆದಿರಬಹುದಾದ ಗುಂಪು ಕೊಲೆಗಳ ಸಾಕ್ಷ್ಯಗಳು ಜರ್ಮನಿಯ ಫ್ರಾಂಕ್ಫರ್ಟ್ ನಗರದ ಹೊರವಲಯದಲ್ಲಿ ಪತ್ತೆಯಾಗಿದೆ ಎಂದು ಮಾಧ್ಯಮವೊಂದು ಮಂಗಳವಾರ ವರದಿ ಮಾಡಿದೆ.
೭೦೦೦ ವರ್ಷಗಳ ಹಿಂದಿನ ನಿಯೋಲಿಥಿಕ್ ಸಮಯದ ಈ ಪಳೆಯುಳಿಕೆಗಳನ್ನು ಮೊದಲ ಬಾರಿ ೨೦೦೬ರಲ್ಲಿ ಫ್ರಾಂಕ್ಫರ್ಟ್ ನಗರದಿಂದ ೧೫ ಕಿಮೀ ಹೊರವಲಯದಲ್ಲಿ ಅಗೆದು ಪತ್ತೆಹಚ್ಚಲಾಗಿತ್ತು. ಆದರೆ ಸಂಶೋಧಕರು ನಂತರ ಆ ಪಳೆಯುಳಿಕೆಗಳ ಮೂಳೆಗಳನ್ನು ಸೂಕ್ಷ್ಮವಾಗಿ ಪರೀಕ್ಷೆ ಮಾಡಿದ್ದರು.
"ಕನಿಷ್ಠ ೨೬ ಜನರಿಗೆ ಚಿತ್ರಹಿಂಸೆ ನೀಡಿ ಕೊಂದು ಗುಂಡಿಗೆ ಹಾಕಲಾಗಿದೆ" ಎಂದು ಮುಖ್ಯ ಸಂಶೋಧಕ ಕ್ರಿಶ್ಚಿಯನ್ ಮೇಯರ್ ಸೋಮವಾರ ತಿಳಿಸಿದ್ದಾರೆ.
ದಾಳಿ ಮಾಡಿರುವವರು ಬಹುಶಃ ಸಂತ್ರಸ್ತರನ್ನು ಪ್ರಾಣಿಗಳ ಮೂಳೆಯಿಂದ ತಯಾರಿಸಿರುವ ಬಾಣಗಳು ಮತ್ತು ಕಲ್ಲಿನ ಕೊಡಲಿಗಲಲ್ಲಿ ಕೊಂದಿದ್ದಾರೆ ಎಂದು ತಿಳಿಸಿದ್ದಾರೆ.
೨೬ ಜನರಲ್ಲಿ ೧೨ ರಿಂದ ೧೩ ಜನ ಮಕ್ಕಳು, ಇಬ್ಬರು ಮಹಿಳೆಯರು ಮತ್ತುಳಿದವರು ಪುರುಷರು ಎಂದು ಅಂದಾಜಿಸಲಾಗಿದೆ. ಇಬ್ಬರೂ ಮಹಿಳೆಯರು ಸುಮಾರು ೪೦ ವರ್ಷದವರು ಎಂದು ತಿಳಿಯಲಾಗಿದೆ.
"ಈ ದಾಳಿಯ ವೇಳೆಯಲ್ಲಿ ಯುವ ಮಹಿಳೆಯರನ್ನು ಅಪಹರಿಸಲಾಗಿದೆ ಎಂಬುದನ್ನು ಇದು ತಿಳಿಸುತ್ತದೆ" ಎಂದು ಮೇಯರ್ ತಿಳಿಸಿದ್ದಾರೆ.
ಯಾವುದೇ ಸಂಪ್ರದಾಯ ಅಥವಾ ಗೌರವಯುತ ಸಂಸ್ಕಾರಗಳನ್ನು ಸೂಚಿಸಲು ಯಾವುದೇ ಸಾಕ್ಷ್ಯ ಸಿಕ್ಕಿಲ್ಲ ಎಂದು ಅವರು ತಿಳಿಸಿದ್ದಾರೆ.
ದಾಳಿಕೋರರ ಉದ್ದೇಶದ ಬಗ್ಗೆ ಊಹಿಸಿವುದು ಕಷ್ಟ ಎಂದಿರುವ ಮೇಯರ್ ಮತ್ತು ಸಹೋದ್ಯೋಗಿಗಳು, ಬಹುಶಃ ಇಡಿ ಗ್ರಾಮದವರನ್ನು ಕೊಂದು ಹಾಕಿರಬಹುದು ಎಂದಿದ್ದಾರೆ.