ನವದೆಹಲಿ: ಇಸ್ಲಾಮಿಕ್ ಸ್ಟೇಟ್ ಉಗ್ರಗಾಮಿ ಸಂಘಟನೆಯಿಂದ ಭಾರತ ಮೇಲೆ ದಾಳಿ ಸಾಧ್ಯತೆ ಇದೆ ಎಂದು ಬ್ರಿಟನ್ ಎಚ್ಚರಿಸಿದೆ ಹಾಗೂ ಮಧ್ಯ ಪೂರ್ವ ದೇಶಗಳ ಉಗ್ರಗಾಮಿ ಸಂಘಟನೆಯ ಈ ದಾಳಿ ತಡೆಯಲು ಎಲ್ಲ ಕ್ರಮಗಳನ್ನು ತೆಗೆದುಕೊಳ್ಳಬೇಕು ಎಂದು ಹೇಳಿದೆ.
ಜನವರಿ ೧೫-೧೬ ರಂದು ನಡೆದ ಭಾರತ-ಯುಕೆ ಉಗ್ರಗಾಮಿ ತಡೆ ಜಂಟಿ ಕಾರ್ಯ ಸಭೆಯಲ್ಲಿ ಭಾರತದ ಅಧಿಕಾರಿಗಳಿಗೆ ಬ್ರಿಟಿಶ್ ಅಧಿಕಾರಿಗಳು ಈ ಎಚ್ಚರಿಕೆ ನೀಡಿದ್ದಾರೆ.
ಇದೇ ವೇಳೆಯಲ್ಲಿ ಭಾರತದ ಅಧಿಕಾರಿಗಳು, ಪಾಕಿಸ್ತಾನ ಹೇಗೆ ಉಗ್ರಗಾಮಿಗಳಿಗೆ ಮನೆಯಾಗಿದೆ ಹಾಗೂ ಪಾಕಿಸ್ತಾನಕ್ಕೆ "ಒಳ್ಳೆಯ" ಮತ್ತು "ಕೆಟ್ಟ" ಭಯೋತ್ಪಾದನೆ ಎಂದು ವರ್ಗೀಕರಿಸದಿರಲು ಸೂಚನೆ ನೀಡುವಂತೆ ಬ್ರಿಟನ್ ಅಧಿಕಾರಿಗಳಿಗೆ ಮನವರಿಕೆ ಮಾಡಿಕೊಟ್ಟಿದ್ದಾರೆ ಎಂದು ತಿಳಿದುಬಂದಿದೆ.
ನಾವು ಲಷ್ಕರ್-ಎ-ತೈಬಾ ಸಂಘಟನೆಯಿಂದ ಇರುವ ಭಯೋತ್ಪಾದನಾ ದಾಳಿಗಳ ಬಗ್ಗೆ ಮುನ್ನೆಚ್ಚರಿಕೆ ನೀಡಿ ಎಂದಿದ್ದೆವು. ಅವರು ಐ ಎಸ್ ದಾಳಿಯ ಬಗ್ಗೆ ಮುನ್ನೆಚ್ಚರಿಕೆ ನೀಡಿದ್ದಾರೆ. ಬ್ರಿಟನ್, ಪಾಕಿಸ್ತಾನಿ ಭಯೋತ್ಪಾದಕ ಸಂಘಟನೆಗಳಿಗಿಂತ ಐ ಎಸ್ ಸಂಘಟನೆಯ ಮೇಲೆ ಹೆಚ್ಚು ಕಣ್ಣಿಟ್ಟಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಮೇ ೨೦೧೪ ರಲ್ಲಿ ನಾಲ್ಕು ಮುಂಬೈ ಯುವಕರು ಇರಾಕ್-ಸಿರಿಯಾ ಗೆ ಹೋಗಿ ಐ ಎಸ್ ಸಂಘಟನೆಗೆ ಸೇರಿದ್ದರು ಎನ್ನಲಾಗಿದೆ ಅದರಲ್ಲಿ ಒಬ್ಬ ನವೆಂಬರ್ ನಲ್ಲಿ ಹಿಂದಿರುಗಿ ಪೊಲೀಸರಿಗೆ ಶರಣಾಗಿದ್ದ.
ಹಾಗೆಯೇ ಐ ಎಸ್ ಸಂಘಟನೆಯ ಪರ ಟ್ವೀಟ್ ಗಳನ್ನು ಮಾಡುತ್ತಿದ್ದ ಬೆಂಗಳೂರು ಮೂಲದ ಒಬ್ಬ ಟೆಕ್ಕಿ ಕಳೆದ ತಿಂಗಳು ಬಂಧಿತನಾಗಿದ್ದ. ಅಮೇರಿಕಾದಿಂದ ಹಿಂದಿರುಗಿದ್ದ ಒಬ್ಬ ಎಂಜಿನಿಯರ್, ಐ ಎಸ್ ಸೇರಲು ಸನ್ನದ್ಧನಾಗಿದ್ದ. ಆದರೆ ಅವನನ್ನು ಎರಡು ದಿನಗಳ ಹಿಂದೆ ಹೈದರಾಬಾದ್ ನಲ್ಲಿ ಬಂಧಿಸಲಾಗಿತ್ತು.