ನವದೆಹಲಿ: ಹಲವಾರು ವಾರಗಳ ಕುತೂಹಲಕ್ಕೆ ತೆರೆ ಎಳೆದಿರುವ ರಾಷ್ಟ್ರೀಯ ಜನತಾ ದಳ ಮತ್ತು ಸಂಯುಕ್ತ ಜನತಾ ದಳ ಪಕ್ಷಗಳು ಮುಂಬರಲಿರುವ ಬಿಹಾರ ವಿಧಾನಸಭಾ ಚುನಾವಣೆಯಲ್ಲಿ ಜಂಟಿಯಾಗಿ ಕಣಕ್ಕಿಳಿಯುವುದಾಗಿ ಭಾನುವಾರ ಘೋಷಿಸಿವೆ.
ಕ್ಷೇತ್ರ ಹಂಚಿಕೆಗಾಗಿ ಎರಡು ಪಕ್ಷಗಳಿಂದ ಮೂರು ಸದಸ್ಯರನ್ನೊಳಗೊಂಡ ಆರು ಜನರ ತಂಡ ರಚಿಸಲಾಗುವುದು ಎಂದು ಕೂಡ ತಿಳಿದು ಬಂದಿದೆ.
ಆದರೆ ಮುಖ್ಯಮಂತ್ರಿ ಅಭ್ಯರ್ಥಿಯ ಮೇಲೆ ಎರಡು ಪಕ್ಷಗಳು ಮೌನ ವಹಿಸಿವೆ. ಇದೇ ವಿಷಯವಾಗಿ ಈ ಮೈತ್ರಿ ಅಸಾಧ್ಯ ಎನ್ನಲಾಗಿತ್ತು.
ಬಿಜೆಪಿ ಪಕ್ಷವನ್ನು ಅಧಿಕಾರದಿಂದ ದೂರವಿಡಲು ಸಮಾಜವಾದಿ ಪಕ್ಷದ ನಾಯಕ ಮುಲಾಯಂ ಸಿಂಗ್ ಯಾದವ್ ಅವರ ಮನೆಯಲ್ಲಿ ಬಿಹಾರ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಮತ್ತು ಆರ್ ಜೆ ಡಿ ಮುಖಂಡ ಲಾಲು ಪ್ರಸಾದ್ ಯಾದವ್ ಅವರು ಭೇಟಿ ಮಾಡಿ ಭಿನ್ನಾಭಿಪ್ರಾಯಗಳನ್ನು ಬಗೆ ಹರಿಸಿಕೊಂಡಿದ್ದಾರೆ ಎನ್ನಲಾಗಿದೆ. ಜೆ ಡಿ ಯು ಮುಖಂಡ ಶರದ್ ಯಾದವ್ ಕೂಡ ಸಭೆಯಲ್ಲಿ ಭಾಗವಹಿಸಿದ್ದರು.
ಎರಡು ಘಂಟೆಗಳ ಸಭೆಯ ನಂತರ್ ಮಾತನಾಡಿದ ಸಮಾಜವಾದಿ ಪಕ್ಷದ ಪ್ರಧಾನ ಕಾರ್ಯದರ್ಶಿ ರಾಮ ಗೋಪಾಲ್ ಯಾದವ್ "ಬಿಹಾರ ಚುನಾವಣೆಗಳನ್ನು ಜೆಡಿಯು ಮತ್ತು ಆರ್ ಜೆ ಡಿ ಜಂಟಿಯಾಗಿ ಸೆಣಸಲಿವೆ ಎಂದು ಇಂದು ನಿರ್ಧರಿಸಲಾಯಿತು" ಎಂದು ತಿಳಿಸಿದ್ದಾರೆ.
ಆರು ಜನರ ತಂಡದ ವಿವರವನ್ನು ಹೇಳಲು ನಿರಾಕರಿಸಿದ ಅವರು "ಎರಡು ಪಕ್ಷಗಳಿಂದ ಮೂವರು ಸದಸ್ಯರಿರುತ್ತಾರೆ. ಹಾಗೂ ಮುಖ್ಯಮಂತ್ರಿಯ ವಿಷಯವನ್ನು ನಂತರ ಬಗೆಹರಿಸಲಾಗುವುದು" ಎಂದು ತಿಳಿಸಿದ್ದಾರೆ.
ಜೆಡಿಯು ಪಕ್ಷದ ನಿತೀಶ್ ಕುಮಾರ ತಮ್ಮನ್ನೇ ಮುಖ್ಯಮಂತ್ರಿ ಅಭ್ಯರ್ಥಿಯನ್ನಾಗಿ ಘೋಷಿಸಬೇಕು ಎಂದು ಪಟ್ಟು ಹಿಡಿದ್ದಿದ್ದರೂ ಲಾಲು ಪ್ರಸಾದ್ ಇದಕ್ಕೆ ನಿರಾಕರಿಸಿದ್ದಾರೆ ಎಂದು ತಿಳಿದುಬಂದಿದೆ. ಈ ಸಭೆಗೂ ಮೊದಲು ನಿತೀಶ್ ಕುಮಾರ್ ರಾಹುಲ್ ಗಾಂಧಿ ಅವರನ್ನು ಕೂಡ ಭೇಟಿ ಮಾಡಿದ್ದು ಕುತೂಹಲಕ್ಕೆ ಎಡೆಮಾಡಿಕೊಟ್ಟಿದೆ.