ಪಾಟ್ನಾ: ಬಿಜೆಪಿ ರಾಷ್ಟ್ರಾಧ್ಯಕ್ಷ ಅಮಿತ್ ಷಾ ಅವರು ಮುಸ್ಲಿಂ ಯೋಗ ಗುರುಗಳಿಂದ ಜೂನ್ ೨೧ರ ಅಂತರಾಷ್ಟ್ರೀಯ ಯೋಗ ದಿನದಂದು ಆಯೋಜಿಸಲಾಗಿರುವ ವಿಷೇಶ ಶಿಬಿರದಲ್ಲಿ ಯೋಗ ಪಾಠ ಹೇಳಿಸಿಕೊಳ್ಳಲಿದ್ದಾರೆ.
"ಯೋಗ ಗುರುಗಳಾದ ಮೊಹಮ್ಮದ್ ತಮನ್ನ ಮತ್ತು ಅಶೋಕ್ ಸರ್ಕಾರ ಮೊಯ್ನಿಲ್ ಹಕ್ ಮೈದಾನದಲ್ಲಿ ಅಮಿತ್ ಷಾ ಅವರಿಗೆ ಯೋಗ ಕಲಿಸಲಿದ್ದಾರೆ" ಎಂದು ಬಿಹಾರ-ಜಾರ್ಖಂಡದ ಪತಂಜಲಿ ಯೋಗಪೀಠದ ಉಸ್ತುವಾರಿ ಅಜಿತ್ ಕುಮಾರ್ ಮಂಗಳವಾರ ತಿಳಿಸಿದ್ದಾರೆ.
ಬಿಹಾರದ ಕೇಂದ್ರ ಸಚಿವರು ಈ ಯೋಗ ಶಿಬಿರದಲ್ಲಿ ಭಾಗವಹಿಸಲಿದ್ದಾರೆ. ಅವರುಗಳಲ್ಲಿ ರವಿ ಶಂಕರ್ ಪ್ರಸಾದ್, ರಾಜೀವ್ ಪ್ರತಾಪ್ ರೂಡಿ, ರಾಧ ಮೋಹನ್ ಸಿಂಗ್ ಮತ್ತು ರಾಮ್ ಕೃಪಾಲ್ ಯಾದವ್ ಪ್ರಮುಖರು.
ಈ ಯೋಗ ಶಿಬಿರದಲ್ಲಿ ಅಮಿತ್ ಷಾ ಭಾಗವಹಿಸುತ್ತಿರುವುದು ರಾಜಕೀಯ ಬಣ್ಣ ಪಡೆದುಕೊಂಡಿದೆ.
ಬಿಜೆಪಿ ಪಕ್ಷ ಮತ್ತು ನರೇಂದ್ರ ಮೋದಿ ಅವರನ್ನು ಟೀಕಿಸಿರುವ ಬಿಹಾರ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಇವರು ಯೋಗವನ್ನು ಪ್ರಚಾರ ಮತ್ತು ಶೋಕಿಗೆ ಬಳಸುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ. ಜೂನ್ ೨೧ರ ಶಿಬಿರವನ್ನು ನಾಟಕ ಎಂದಿದ್ದಾರೆ.
ಇದಕ್ಕೆ ಪ್ರತಿಕ್ರಿಯಿಸಿರುವ ದೂರಸಂಪರ್ಕ ಖಾತೆ ಸಚಿವ ರವಿಶಂಕರ್ ಪ್ರಸಾದ್ ಶಾಂತಿಯುತ ಮನಸ್ಸಿಗಾಗಿ ಪ್ರಾಣಾಯಾಮ ಮಾಡುವಂತೆ ನಿತೀಶ್ ಕುಮಾರ್ ಅವರಿಗೆ ಸಲಹೆ ನೀಡಿದ್ದಾರೆ.