ಸಿಯೋಲ್: ಏಶಿಯಾ ಖಂಡದ ರಾಷ್ಟ್ರಗಳು ಒಗ್ಗೂಡಿ, ವಿಶ್ವ ಸಂಸ್ಥೆಯೂ ಒಳಗೊಂಡಂತೆ ವಿಶ್ವದ ವಿವಿಧ ಸಂಸ್ಥೆಗಳ ಸುಧಾರಣೆಗೆ ಹಾಗೂ ಜಾಗತಿಕ ಹೊಸರೂಪಕ್ಕೆ ಶ್ರಮಿಸಬೇಕು ಎಂದು ಪ್ರಧಾನಿ ನರೇಂದ್ರ ಮೋದಿ ಕರೆ ಕೊಟ್ಟಿದ್ದಾರೆ.
"ಏಶಿಯಾ ಒಂದು ಪ್ರಮುಖ ಶಕ್ತಿಯಾಗಿ ಹೊರಹೊಮ್ಮಬೇಕಾದರೆ, ಕೇವಲ ಪ್ರಾದೇಶಿಕ ತುಣುಕುಗಳಾಗಿ ಕೆಲಸ ಮಾಡಿದರಷ್ಟೇ ಸಾಧ್ಯವಿಲ್ಲ" ಎಂದು ದಕ್ಷಿಣ ಕೊರಿಯಾದ ಸಿಯೋಲ್ ನಲ್ಲಿ ಆರನೇ ಏಶಿಯಾ ನಾಯಕತ್ವ ಸಮಾವೇಶದಲ್ಲಿ ಹೇಳಿದ್ದಾರೆ.
ಈ ಖಂಡದಲ್ಲಿರುವ ವಿರೋಧಗಳು ನಮ್ಮನ್ನು ಹಿಂದಕ್ಕೆ ನೂಕದೆ ಒಂದು ಸಾಮಾನ್ಯ ಗುರಿಗಾಗಿ ಎಲ್ಲ ರಾಷ್ಟ್ರಗಳು ಒಗ್ಗೂಡಿ ಶ್ರಮಿಸಬೇಕು ಎಂದು ಕರೆ ಕೊಟ್ಟಿದ್ದಾರೆ.
ಭಾರತದ ಅಭಿವೃದ್ಧಿ ಏಶಿಯಾದ ಗೆಲುವಿನ ಕಥೆಯಾಗಲಿದ್ದು ಏಶಿಯಾ ಕನಸನ್ನು ಸಾಕಾರಗೊಳಿಸಲು ಇದು ಸಹಕಾರಿಯಾಗಲಿದೆ ಎಂದಿದ್ದಾರೆ ಮೋದಿ.
"ನನ್ನ ಏಶಿಯಾ ಕನಸೇನೆಂದರೆ ಸಂಪೂರ್ಣ ಏಶಿಯಾ ಒಟ್ಟಿಗೆ ಮೇಲೇಳಬೇಕು... ನನ್ನ ಭಾರತದ ಮುಂಂದಿನ ಕನಸು ನಮ್ಮ ನೆರೆ ಹೊರೆಯವರ ಕನಸು ಕೂಡ ಆಗಿರುತ್ತದೆ. ನಮ್ಮ ಅಭಿವೃದ್ಧಿ ನೆರೆಹೊರೆಯ ರಾಷ್ಟ್ರಗಳನ್ನು ಒಳಗೊಂಡಿರುತ್ತದೆ" ಎಂದು ಮೂರು ರಾಷ್ರಗಳ ಪ್ರವಾಸದೆ ಕೊನೆಯ ಹಂತದ ಪ್ರವಾಸದ ಸಮಯದಲ್ಲಿ ಪ್ರಧಾನಿ ಹೇಳಿದ್ದಾರೆ.
"ಏಶಿಯಾ ಖಂಡದ ಸಂಪರ್ಕಕ್ಕೆ ನಾವು ಶ್ರಮಿಸುತ್ತೇವೆ" ಎಂದು ಕೂಡ ಮೋದಿ ತಿಳಿಸಿದ್ದಾರೆ.
ಹೆಚ್ಚು ಅಭಿವೃದ್ಧಿಯಾಗಿರುವ ಏಶಿಯಾ ದೇಶಗಳು ಇತರ ರಾಷ್ಟ್ರಗಳೊಂದಿಗೆ ತಮ್ಮ ಸಂಪನ್ಮೂಲಗಳನ್ನು ಹಂಚಿಕೊಳ್ಳಬೇಕು ಎಂದು ಮೋದಿ ಕರೆ ಕೊಟ್ಟಿದ್ದಾರೆ.