ನವದೆಹಲಿ: ``ಭವಿಷ್ಯದಲ್ಲಿ ನಾವು ಸೈಬರ್ ಯುದ್ಧಗಳನ್ನು ಎದುರಿಸಬೇಕಾಗಬಹುದು.'' ಇಂತಹುದೊಂದು ಆತಂಕ ವ್ಯಕ್ತಪಡಿಸಿದ್ದು ಬೇರಾರೂ ಅಲ್ಲ, ರಕ್ಷಣಾ ಸಚಿವ ಮನೋಹರ್ ಪರ್ರಿಕರ್.``ಇಂದಿನ ಜಗತ್ತಿನಲ್ಲಿ ಮಾಹಿತಿ ತಂತ್ರಜ್ಞಾನವು ಮಹತ್ವದ ಪಾತ್ರ ವಹಿಸುತ್ತಿದೆ. ಹಾಗಂತ, ಸಾಂಪ್ರದಾಯಿಕ ಸೇನೆಯನ್ನು ಬದಲಿಸಬೇಕಿಲ್ಲ. ಸೇನಾ ಅರಿವಿಗೆ ಅಗತ್ಯವಾದ ತಂತ್ರಜ್ಞಾನ ಗಳು ಹಾಗೂ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಬೇಕಿದೆ. ಈ ವಿಚಾರದಲ್ಲಿ ನಾವು ಐಎಎಸ್‍ನಂತಹ ಉಗ್ರ ಸಂಘಟನೆಯ ಉದಾಹರಣೆಯನ್ನೇ ತೆಗೆದುಕೊಳ್ಳಬಹುದು. ಈ ಸಂಘಟನೆ ಇಂಟರ್ನೆಟ್ ಅನ್ನು ಬಳಸಿಕೊಂಡೇ ಉಗ್ರರ ನೇಮಕ ಮಾಡಿಕೊಳ್ಳುತ್ತಿದೆ, ಬೆಂಬಲ ಪಡೆಯುತ್ತಿದೆ. ಇವರು ತಮ್ಮ ಉದ್ದೇಶ ಈಡೇರಿಕೆಗಾಗಿ ತಂತ್ರಜ್ಞಾನವನ್ನು ಪರಿಣಾಮಕಾರಿ ಯಾಗಿ ಬಳಸಿಕೊಳ್ಳುತ್ತಿದ್ದಾರೆ'' ಎಂದಿದ್ದಾರೆ ಪರ್ರಿಕರ್. 

ಉಲ್ಟಾ ಹೊಡೆದ ಐಎಸ್‍ಐಎಸ್: ಲಷ್ಕರ್ ಪಾಕಿಸ್ತಾನಸೇನೆಯ ಆದೇಶದಂತೆ ಕೆಲಸ ಮಾಡುತ್ತದೆ ಎಂದು ಇತ್ತೀಚೆಗಷ್ಟೇ ಲೇವಡಿ ಮಾಡಿದ್ದ ಐಎಸ್‍ಐಎಸ್ ಈಗ ಉಲ್ಟಾ ಹೊಡೆದಿದೆ. ``ಅಲ್‍ಖೈದಾವು ಪಾಕ್ ಸೇನೆಯ ಕೈಗೊಂಬೆಯಲ್ಲ. ಪಾಕ್ ಸೇನೆಯೇ ಧರ್ಮಭ್ರಷ್ಟ ಹಾಗೂ ಅನೈತಿಕ ಪಡೆಯಾಗಿದೆ'' ಎಂದು ಐಎಸ್ ಹೇಳಿದೆ. ಸಮರಕ್ಕೆ ಹಿಂದೆಸರಿದ ಪಾಕ್: ಐಎಸ್ ಉಗ್ರಗಾಮಿಗಳನ್ನು ಮಟ್ಟಹಾಕ ಲೆಂದು ಅಮೆರಿಕವು ಅತಿದೊಡ್ಡ ಸೇನಾ ಮೈತ್ರಿಗೆ  ಮುಂದಾಗಿದ್ದರೆ, ಪಾಕ್ ಈ ಪ್ರಸ್ತಾಪವನ್ನು ತಿರಸ್ಕರಿಸಿದೆ. ``ನಾವು ಆಫ್ಗಾನ್ ಗಡಿಯಲ್ಲಿ 1.82 ಲಕ್ಷ ಸೈನಿಕರನ್ನು ನಿಯೋಜಿಸಿದ್ದೇವೆ. ಈ ಪ್ರದೇಶದ ಹೊರತಾಗಿ ಬೇರೆಲ್ಲೂ ಸೇನಾ ನಿಯೋಜನೆಗೆ ಸಿದ್ಧರಿಲ್ಲ'' ಎಂದು ಹೇಳಿದೆ.