ಡುಬ್ಲಿನ್: ಐರ್ಲೆಂಡ್ ಗೆ ಭೇಟಿ ನೀಡಿರುವ ಪ್ರಧಾನಿ ನರೇಂದ್ರ ಮೋದಿ, ಐರಿಶ್ ಪ್ರಧಾನಿ ಎಂಡ ಕೆನ್ನಿ ಅವರೊಂದಿಗೆ ಮಾತುಕತೆ ನಡೆಸಿದ್ದು ಯುಎನ್ಎಸ್ ಸಿ ಸುಧಾರಣೆಗಳಿಗೆ ಐರ್ಲೆಂಡ್ ನ ಬೆಂಬಲ ಕೋರಿದ್ದಾರೆ.
ವಿಶ್ವಸಂಸ್ಥೆ ಭದ್ರತಾ ಮಂಡಳಿ ಪುನಾರಣೆ ವೇಳೆ ಭಾರತ ಶಾಶ್ವತ ಸದಸ್ಯತ್ವ ಪಡೆಯುವುದಕ್ಕೆ ಐರ್ಲೆಂಡ್ ನ ಬೆಂಬಲ ಕೋರಿರುವ ಪ್ರಧಾನಿ ನರೇಂದ್ರ ಮೋದಿ, ಭಯೋತ್ಪಾದನೆ ಸೇರಿದಂತೆ ಹಲವು ಅಂತಾರಾಷ್ಟ್ರೀಯ ಸವಾಲುಗಳು ಹಾಗೂ ಯೂರೋಪ್ ಹಾಗೂ ಏಷ್ಯಾ ಎದುರಿಸುತ್ತಿರುವ ಪ್ರಸಕ್ತ ಸನ್ನಿವೇಶಗಳ ಬಗ್ಗೆ ಚರ್ಚೆ ನಡೆಸಿದ್ದಾರೆ.
"ಶಾಂತಿಪಾಲನಾ ಕಾರ್ಯಾಚರಣೆಯಲ್ಲಿ ಉಭಯ ರಾಷ್ಟ್ರಗಳೂ ಉತ್ತಮ ಪಾಲುದಾರಿಕೆ ಹೊಂದಿವೆ. ಸ್ಥಿರ ಅಭಿವೃದ್ಧಿಗಾಗಿ ಐರ್ಲೆಂಡ್ ನ ಕೊಡುಗೆಗೆ ಧನ್ಯವಾದ ಅರ್ಪಿಸುತ್ತೇನೆ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ. ಐರ್ಲೆಂಡ್ ನ ಮಕ್ಕಳು ಸಂಸ್ಕೃತ ಗೀತೆಗಳ ಮೂಲಕ ತಮ್ಮನ್ನು ಸ್ವಾಗತಿಸಿದ್ದಕ್ಕೆ ಪ್ರಧಾನಿ ನರೇಂದ್ರ ಮೋದಿ ಸಂತಸ ವ್ಯಕ್ತಪಡಿಸಿದ್ದು, ವಿದ್ಯಾರ್ಥಿಗಳ ಶಿಕ್ಷಕರಿಗೆ ಅಭಿನಂದನೆ ಸಲ್ಲಿಸಿದ್ದಾರೆ.   
ಭಾರತದಲ್ಲೇನಾದರೂ ಸಂಸ್ಕೃತ ಗೀತೆಗಳನ್ನು ಹಾಡಿದ್ದರೆ, ಈ ವೇಳೆಗೆ ಜಾತ್ಯಾತೀತತೆ ಬಗ್ಗೆ ಪ್ರಶ್ನೆಗಳು ಉದ್ಭವಿಸುತ್ತಿತ್ತು ಎಂದು ಮೋದಿ ಹೇಳಿದ್ದಾರೆ ಎಂದು ರಾಷ್ಟ್ರೀಯ ಮಾಧ್ಯಮವೊಂದು ವರದಿ ಮಾಡಿದೆ.