ಲಕನೌ: ಮುಸ್ಲಿಮರನ್ನು ಮತ ಬ್ಯಾಂಕ್ ರಾಜಕಾರಣಾಕ್ಕಾಗಿ ಬಳಸಿಕೊಳ್ಳುತ್ತಿದ್ದಾರೆ ಎಂದು ಸಮಾಜವಾದಿ ಪಕ್ಷದ ಮುಖ್ಯಸ್ಥ ಮುಲಾಯಂ ಸಿಂಗ್ ಯಾದವ್ ಮತ್ತು ಉತ್ತರಪ್ರದೇಶದ ಮುಖ್ಯಮಂತ್ರಿ ಅಖಿಲೇಶ್ ಯಾದವ್ ಅವರನ್ನು ರಾಷ್ಟ್ರೀಯ ಉಲ್ಮಾ ಮಂಡಲಿಯ ಅಧ್ಯಕ್ಷ ಮೌಲಾನ ಆಮೀರ್ ರಶ್ದಿ ಮದನಿ ಮಂಗಳವಾರ ಟೀಕಿಸಿದ್ದಾರೆ.
ಉತ್ತರಪ್ರದೇಶದಲ್ಲಿ ಸಮಾಜವಾದಿ ಪಕ್ಷ ಅಧಿಕಾರಕ್ಕೆ ಬಂದ ನಾಲ್ಕು ವರ್ಷಗಳಲ್ಲಿ ೪೫೭ ಕೋಮು ಗಲಭೆಗಳಾಗಿದ್ದರೂ, ಮುಲಯಾಂ-ಅಖಿಲೇಶ್ ರಾಜ್ಯದ ಮುಸ್ಲಿಮರ ಹಿತೈಷಿಗಳು ಎಂದು ಹೇಳಿಕೊಳ್ಳುತ್ತಿರುವುದು ವಿಚಿತ್ರ ಎಂದು ಕೂಡ ಅವರು ಹೇಳಿದ್ದಾರೆ.
"ಮುಲಾಯಂ ಸಿಂಗ್ ಮತ್ತು ಅವರ ಪುತ್ರ ಅಖಿಲೇಶ್ ಯಾದವ್ ಅವರ ಆಡಳಿತದಲ್ಲಿ ಸುಮಾರು ೪೫೭ ಕೋಮು ಗಲಭೆಗಳಾಗಿವೆ ಮತ್ತು ಈಗಲೂ ಅವರಿಬ್ಬರೂ ಮುಸ್ಲಿಮರ ಅರ್ಧ-ದೇವತೆಗಳಾಗಿದ್ದರೆ ಆದರೆ ಒಂದು ಗಲಭೆಯ ನಂತರ ಮೋದಿ ಮುಸ್ಲಿಮರ ಶತ್ರು ಆಗಿಬಿಟ್ಟಿದ್ದರು" ಎಂದು ಕೂಡ ಮೌಲಾನ ಹೇಳಿದ್ದಾರೆ.
ಕೆಲವು ರಾಜಕೀಯ ಪಕ್ಷಗಳು, ಬಿಜೆಪಿ ಪಕ್ಷ ಮುಸ್ಲಿಮರ ವಿರೋಧಿ ಎಂಬ ಪಟ್ಟ ಕಟ್ಟಿ ನಂತರ ಬರೀ ಮತ ಬ್ಯಾಂಕಾಗಿ ಮುಸ್ಲಿಮರನ್ನು ಬಳಸಿಕೊಳ್ಳುತ್ತವೆ ಎಂದು ಅವರು ದೂರಿದ್ದಾರೆ.
ದೇಶದಲ್ಲಿ ಹಿಂದುಗಳು ಮುಸ್ಲಿಮರ ನಡುವೆ ಉತ್ತಮ ಬಾಂಧವ್ಯ, ಸೌಹಾರ್ದದ ಅವಶ್ಯಕತೆ ಇದೆ ಎಂದು ಕೂಡ ಉಲ್ಮಾ ಮಂಡಲಿಯ ಅಧ್ಯಕ್ಷ ಹೇಳಿದ್ದಾರೆ.