ನವದೆಹಲಿ: ಭಾರತದಲ್ಲಿ ಬುಲೆಟ್ ರೈಲಿನ ಆಗಮನಕ್ಕಾಗಿ ಎಲ್ಲರೂ ಕುತೂಹಲದಿಂದ ಎದುರು ನೋಡುತ್ತಿದ್ದೇವೆ. ಭಾರತದ ಈ ನೂತನ ಬುಲೆಟ್ ರೈಲು ಜಪಾನ್ ಇಂಟರ್‌ನ್ಯಾಷನಲ್ ಕಾರ್ಪರೇಷನ್ ಏಜೆನ್ಸಿಯ ಯೋಜನೆಯಲ್ಲಿ ತಯಾರಾಗಲಿದ್ದು, ಪ್ರಸ್ತುತ ಏಜೆನ್ಸಿ ಹೊಸ ರೈಲಿನ ಸಾಮರ್ಥ್ಯ ಹೇಗಿರುತ್ತದೆ ಎಂಬುದನ್ನು ಬಹಿರಂಗಪಡಿಸಿದೆ.

ಮುಂಬೈಯಿಂದ ಅಹ್ಮದಾಬಾದ್ ವರೆಗೆ 315 ಮೈಲುಗಳಷ್ಟು ಸಂಚರಿಸಲಿರುವ ಈ ರೈಲು ಥಾಣೆಯಿಂದ ವಿರಾರ್‌ಗೆ ಸಾಗುವ ನದಿಯ ಖಾರಿಯಲ್ಲಿ 13 ಮೈಲುಗಳಷ್ಟು ದೂರವನ್ನು ಜಲಾಂತರ್ಗಾಮಿಯಾಗಿ ಕ್ರಮಿಸಲಿದೆ.

ಅತೀ ವೇಗದ ರೈಲು ಎಂದೇ ಹೇಳಲ್ಪಡುವ ದುರಂತೋ ಎಕ್ಸ್‌ಪ್ರೆಸ್ ಮುಂಬೈಯಿಂದ ಅಹ್ಮದಾಬಾದ್‌ಗೆ ತಲುಪಲು 7 ಗಂಟೆಗೆ ತೆಗೆದುಕೊಳ್ಳುತ್ತಿದೆ. ಅದೇ ವೇಳೆ ಗಂಟೆಗೆ 217 ಮೀ ಸಂಚರಿಸಬಲ್ಲ ನೂತನ ಬುಲೆಟ್ ರೈಲು ಮುಂಬೈಯಿಂದ ಅಹ್ಮದಾಬಾದ್‌ಗೆ ಎರಡು  ಗಂಟೆಗಳಲ್ಲಿ ತಲುಪಲಿದೆ. 

2018ರ ಅಂತ್ಯಕ್ಕೆ ಈ ಬುಲೆಟ್ ರೈಲಿನ ಯೋಜನೆ ಆರಂಭವಾಗಲಿದೆ.

ಟೋಕಿಯೋ ದಿಂದ ಹಕೋಡಾಟೆ ನಡುವೆ ಸಂಚರಿಸುವ  ಜಪಾನ್‌ನ ಬುಲೆಟ್ ರೈಲು (ಶಿಂಕಾನ್‌ಸೆನ್)ನಂತೆಯೇ ಭಾರತದ ಹೊಸ ಬುಲೆಟ್ ರೈಲು ಕಾರ್ಯವೆಸಗಲಿದೆ ಎಂದು ಜಪಾನ್ ಟೈಮ್ಸ್ ಮಾಧ್ಯಮ ವರದಿ ಮಾಡಿದೆ.