ನವದೆಹಲಿ: ೨೦೧೫ರಲ್ಲಿ ಭಾರತದಲ್ಲಿ ವಾಯುಮಾಲಿನ್ಯ ಚೈನಾಗಿಂತಲೂ ಹೆಚ್ಚಿದ್ದು, ೨೧ನೆ ಶತಮಾನದಲ್ಲಿ ಮೊದಲ ಬಾರಿಗೆ ಇದು ಸಂಭವಿಸಿದೆ ಎಂದು ನಾಸಾದ ಸಟಲ್ಲೈಟ್ ಡಾಟ ಪರಿಶೀಲಿಸಿ ನೀಡಿರುವ ವರದಿಯಲ್ಲಿ ಗ್ರೀನ್ ಪೀಸ್ ಎನ್ ಜಿ ಒ ತಿಳಿಸಿದೆ.
"ಈ ಶತಮಾನದಲ್ಲಿ ಮೊದಲ ಬಾರಿಗೆ ಭಾರತೀಯರು ಚೈನಾ ನಾಗರಿಕರಿಗಿಂತಲೂ ಹೆಚ್ಚಿನ ವಾಯುಮಾಲಿನ್ಯಕ್ಕೆ ಒಡ್ಡಿಕೊಂಡಿದ್ದಾರೆ. ವಾಯುಮಾಲಿನ್ಯ ತಡೆಯಲು ಚೈನಾ ಕೈಗೊಂಡ ಕ್ರಮಗಳಿಂದ ಉಸಿರಾಡುವ ಗಾಳಿಯ ಗುಣಮಟ್ಟ ಹೆಚ್ಚಿದ್ದು, ಕಳೆದ ದಶಕದಲ್ಲಿ ಭಾರತದಲ್ಲಿ ವಾಯುಮಾಲಿನ್ಯ ತೀವ್ರ ಏರಿಕೆ ಕಂಡಿದೆ" ಎಂದು ಗ್ರೀನ್ ಪೀಸ್ ವರದಿ ಮಾಡಿದೆ.
ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ, ೧೩ ರಿಂದ ೨೦ ವಿಶ್ವದ ಅತಿ ಹೆಚ್ಚಿನ ವಾಯುಮಾಲಿನ್ಯ ನಗರಿಗಳಿಗೆ ಭಾರತ ತವರಾಗಿದೆ ಎಂದಿರುವ ಗ್ರೀನ್ ಪೀಸ್, ಇದು ಉತ್ತರ ಭಾರತದಲ್ಲಿ ಅತಿ ಹೆಚ್ಚು ಎಂದಿದೆ.
ವಾಯುಮಾಲಿನ್ಯವನ್ನು ಕಡಿತಗೊಳಿಸಲು ಭಾರತ ಶೀಘ್ರವೇ ಕ್ರಮ ತೆಗೆದುಕೊಳ್ಳಬೇಕು ಎಂದು ಅಭಿಪ್ರಾಯಪಟ್ಟಿರುವ ಎನ್ ಜಿ ಒ "ಪ್ರಾದೇಶಿಕವಾಗಿ ಹಾಗು ನಗರಗಳಲ್ಲಿ ವಾಯುಮಾಲಿನ್ಯ ತಗ್ಗಿಸಲು ಸಮಗ್ರವಾದ ಅಧ್ಯಯನ ಮತ್ತು ಯೋಜನೆ ಅಗತ್ಯ" ಎಂದು ಕೂಡ ಗ್ರೀನ್ ಪೀಸ್ ತಿಳಿಸಿದೆ.