ಕೊಟ್ಟಾಯಂ: ಲಿಬಿಯಾದ ಸಬ್ರಾಥ ನಗರದಲ್ಲಿ ನಡೆದ ಶೆಲ್ ದಾಳಿಯಲ್ಲಿ, ತಮ್ಮ ಮನೆಯ ಮೇಲೆ ಅಪ್ಪಳಿಸಿದ ಶೆಲ್ ನಿಂದ ಕೇರಳ ಮೂಲದ ನರ್ಸ್ ಮತ್ತು ಅವರ ಪುತ್ರ ಮೃತಪಟ್ಟಿದ್ದಾರೆ ಎಂದು ಅಧಿಕಾರಿಗಳು ಶನಿವಾರ ತಿಳಿಸಿದ್ದಾರೆ.

ಶುಕ್ರವಾರ ರಾತ್ರಿ ವಸತಿ ಸಮುಚ್ಚಯಕ್ಕೆ ಶೆಲ್ ಅಪ್ಪಳಿಸಿದ್ದರಿಂದ ಈ ದುರ್ಮರಣ ಉಂಟಾಗಿದೆ. ಮನೆಯ ಒಳಗಿದ್ದ ಸುನು ಮತ್ತು ಅವರ 18 ತಿಂಗಳ ಮಗು ಮೃತಪಟ್ತಿದ್ದರೆ, ಮನೆಯಿಂದ ಹೊರಗಿದ್ದ ಸುನು ಅವರ ಪತಿ ವಿಪಿನ್ ಬದುಕುಳಿದಿದ್ದಾರೆ.

ಈ ಇಬ್ಬರಷ್ಟೇ ಅಲ್ಲದೆ ಇನ್ನೂ ಕೆಲವರು ಈ ದಾಳಿಯಲ್ಲಿ ಮೃತಪಟ್ಟಿದ್ದಾರೆ. ವಿಪಿನ್ ಮತ್ತು ಸುನು ನರ್ಸ್ ಜೋಡಿ, ೨೦೧೨ ರಲ್ಲಿ ತಮ್ಮ ಮದುವೆಯ ನಂತರ ಲಿಬಿಯಾಗೆ ಬಂದಿದ್ದರು.

ಕೇರಳ ಮೂಲದ ಜನರ ಸುರಕ್ಷತೆಗಾಗಿ ಲಿಬಿಯಾದೊಂದಿಗೆ ಸಂಪರ್ಕ ಸಾಧಿಸಲು ಪ್ರಯತ್ನಿಸುತ್ತಿದ್ದೇವೆ ಎಂದು ಕೇರಳ ಮುಖ್ಯಮಂತ್ರಿ ಒಮ್ಮನ್ ಚಾಂಡಿ ಅವರ ಕಚೇರಿ ತಿಳಿಸಿದೆ.