ನವದೆಹಲಿ: ೫೦೦ ಮತ್ತು ೧೦೦೦ ರೂ ನೋಟುಗಳನ್ನು ಹಿಂಪಡೆಯುವ ನಿರ್ಧಾರದಿಂದ ಜನರು ಎದುರಿಸುತ್ತಿರುವ ತೀವ್ರತಮ ತೊಂದರೆಗಳು ಇನ್ನು ಮೂರು ದಿನಗಳಲ್ಲಿ ತಿಳಿಯಾಗದೆ ಹೋದರೆ ಪ್ರತಿಭಟನೆಗಳನ್ನು ತೀರ್ವಗೊಳಿಸುವುದಾಗಿ ತೃಣಮೂಲ ಕಾಂಗ್ರೆಸ್ ಅಧ್ಯಕ್ಷೆ ಮತ್ತು ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಕೇಂದ್ರಕ್ಕೆ ಎಚ್ಚರಿಸಿದ್ದಾರೆ. 

ಆಜಾದ್ ಪುರ ಮಂಡಿಯಲ್ಲಿ ಆಯೋಜಿಸಿದ್ದ ರ್ಯಾಲಿಯಲ್ಲಿ ಮಾತನಾಡಿದ ಮಮತಾ "ಪ್ರಧಾನಿ ಮೋದಿ ಸಂವಿಧಾನದ ನಿಯಮಗಳನ್ನು ಮುರಿದಿದ್ದಾರೆ... ಈ ನಿರ್ಧಾರವನ್ನು ಜಾರಿಗೊಳಿಸುವ ಮೊದಲು ನೀವು (ಮೋದಿ) ಸರಿಯಾದ ಯೋಜನೆಯನ್ನು ಮಾಡಿಕೊಳ್ಳದೆ ಇದ್ದದ್ದೇಕೆ? ಇದರಿಂದ  ಸಾಮಾನ್ಯ ಜನರಿಗೆ ತೊಂದರೆಯಾಗುತ್ತಿದೆ. ನಾವು ಮೂರು ದಿನಗಳ ಸಮಯಾವಕಾಶ ನೀಡಲಿದ್ದೇವೆ. ನೀವು ಈ ತೊಂದರೆಗಳನ್ನು ಸರಿಪಡಿಸದೆ ಇದ್ದರೆ ನಾವು ನಿಮ್ಮನ್ನು ಸುಮ್ಮನೆ ಬಿಡುವುದಿಲ್ಲ. ನಾವಿನ್ನು ಜೀವಂತವಾಗಿದ್ದೇವೆ" ಎಂದಿದ್ದಾರೆ. 

ಈ ದೇಶದ ಜನ ಮೋದಿಯವರ ಮೇಲೆ ನಂಬಿಕೆ ಕಳೆದುಕೊಂಡಿದ್ದಾರೆ ಎಂದು ಕೂಡ ಅವರು ಹೇಳಿದ್ದಾರೆ. ಸಂಸತ್ತಿನಲ್ಲಿ ಇದರ ವಿರುದ್ಧ ನಿಲುವಳಿ ಮಂಡಿಸುವುದಕ್ಕೆ ನಮ್ಮ ಸಂಸದರು ಸಿದ್ಧರಾಗುತ್ತಿದ್ದಾರೆ ಎಂದು ಕೂಡ ಮಮತಾ ಹೇಳಿದ್ದಾರೆ.