ನವದೆಹಲಿ: ಭಾನುವಾರ ರಾತ್ರಿಯಿಂದ ಕಾಣೆಯಾಗಿದ್ದ ನಾಲ್ಕು ವರ್ಷದ ಬಾಲಕಿ ಕೊಲೆಯಾಗಿದ್ದು, ಸೋಮವಾರ ರೈಲ್ವೆ ವಸತಿ ಸಮುಚ್ಚಯದ ಬಳಿ ಮೃತದೇಶ ಪತ್ತೆಯಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ. 

ನಾರ್ತ್ ವೆಸ್ಟ್ ಜಿಲ್ಲೆಯ ಸ್ಲಮ್ ಬಳಿಯಿದ್ದ ಬ್ರಿಟಾನಿಯಾ ಕಾರ್ಖಾನೆಯ ಬಳಿ ಆಟವಾಡುತ್ತಿದ್ದ ಬಾಲಕಿ ಸುಮಾರು ರಾತ್ರಿ ೮:೩೦ ಕ್ಕೆ ಕಾಣೆಯಾಗಿದ್ದಾಳೆ. ಕೇಶವಪುರಂ ಪ್ರದೇಶದಲ್ಲಿ ಸೋಮವಾರ ಬೆಳಗ್ಗೆ ೬ ಘಂಟೆಗೆ ಮೃತದೇಹ ಪತ್ತೆಯಾಗಿದೆ ಎಂದು ಪೊಲೀಸ್ ಉಪ ಆಯುಕ್ತ ವಿಜಯ್ ಸಿಂಗ್ ಹೇಳಿದ್ದಾರೆ. 

ಭಾನುವಾರದಿಂದ ಕಾಣೆಯಾಗಿರುವ ಟೆಂಪೋ ಚಾಲಕ ಬಾಲಕಿಯನ್ನು ಅಪಹರಿಸಿದ್ದಾನೆ ಎಂದು ಅಪ್ರಾಪ್ತ ಬಾಲಕಿಯ ಚಿಕ್ಕಪ್ಪ ಕಮಲೇಶ್ ಕುಮಾರ್ ಆರೋಪಿಸಿದ್ದಾರೆ. 

ಬಾಲಕಿಯನ್ನು ರೇಪ್ ಮಾಡಿ ಕೊಲೆ ಮಾಡಲಾಗಿದೆ ಎಂದು ಕೂಡ ಅವರು ಆರೋಪಿಸಿದ್ದು, ವ್ಯಕ್ತಿಯೊಬ್ಬ ಬಾಲಕಿಯ ಕೈಹಿಡಿದು ನಡೆಯುತ್ತಿರುವ ದೃಶ್ಯವನ್ನು ಹತ್ತಿರದ ಸಂಸ್ಥೆಯೊಂದರಲ್ಲಿ ಅಳವಡಿಸಿರುವ ಸಿಸಿಟಿವಿ ದೃಶ್ಯಾವಳಿಗಳಲ್ಲಿ ನೋಡಿರುವುದಾಗಿ ಅವರು ಆರೋಪಿಸಿದ್ದಾರೆ. 

"ನಾವು ಸಿಸಿಟಿವಿ ದೃಶ್ಯಾವಳಿಯನ್ನು ಪಡೆದಿದ್ದೇವೆ. ಆರೋಪಿಯನ್ನು ಶೀಘ್ರದಲ್ಲೇ ಬಂಧಿಸಲಿದ್ದೇವೆ. ಲೈಂಗಿಕ ದೌರ್ಜನ್ಯವನ್ನು ಅಲ್ಲಗೆಳೆಯುವಂತಿಲ್ಲ. ಇದು ಶವಪರೀಕ್ಷೆಯ ನಂತರವಷ್ಟೇ ತಿಳಿಯುತ್ತದೆ" ಎಂದು ಸಿಂಗ್ ಹೇಳಿದ್ದಾರೆ.